Salmos 90 - DIOSPA QHELQACHISQ

1a

SALMO 90 TAWA KAJ T'AQA ( Sal 90—106 ) Runaj kawsaynenqa samay jinalla

1a (1a) (Moisés Dioswan parlarikuspa mañakorqa)

¹ (1b) Tukuyta Kamachej Dios, qanmin watan watan pakakunayku kanki.

² Manaraj orqokuna ruwasqa kashajtin, nitaj kay jallp'a, kay pachapis kashajtin, wiñaymanta wiñaykama qan Dios kanki.

³ Qanqa runata jallp'aman kutichinki: Wañoj runakuna, jallp'aman kutiychej, nispa.

⁴ Cheqapuni waranqa wata qanpajqa qayna p'unchay pasaj jinalla, tutapi uj puñuy jinalla.

⁵ Qanqa sinch'i mayu yaku jina runakunata apakapunki, runaj kawsaynintaj uj puñuy jinalla. Paykuna tutamanta wiñaj qhora jinalla kanku.

⁶ Tutamanta wiñaspa t'ikaj qhora jinalla kanku, mayqenchus inti yaykuyta qawirparispa ch'akipun, jinalla.

⁷ Cheqapuni, phiñakuyniykeqa tukuchiwayku, pawisqata ruwawayku.

⁸ Mana allinta ruwasqaykoqa qanpa ñawpaqeykipi kashan. Pakaypi juchallisqaykutapis sut'iman orqhonki.

⁹ Cheqatapuni, kawsayniykoqa phiñakuyniykirayku tukukapun, mashkha watatachus kawsanaykoqa samay jinalla chinkapun.

¹⁰ Qanchis chunka watallata kawsayku, aswan kallpayojkunataj pusaj chunkata. Chay jina unayta kawsasqaykoqa llakiyllata, ñak'ariyllata apamun. Sapa wata imata jina ripun, noqayku jinallataj.

¹¹ Pitaj k'araj phiñakuyniykita rejsinri? Pitaj yachan phiñakuyniyki may jinachus kasqantari?

¹² Kawsanayku p'unchayta yuparikuyta yachachiwayku, yachayniyoj kanaykupaj.

¹³ Tata Dios, noqaykuman kutirimpuy. Mashkha unaytataj suyachikuwasqaykuri? Kay kamachiykikunamanta khuyarikuy ari.

¹⁴ Tutamanta munakuyniykiwan sajsachiwayku, mayk'ajkamachus kawsanaykukamataj kusisqa takisqayku.

¹⁵ Qan llakichiwasqayku watakunaman jina unayta kusisqa kawsachiwayku.

¹⁶ Kamachiykikunaman ruwasqaykita rikuchiy, jatun kayniykitataj wawaykuman rejsichiy.

¹⁷ Tukuyta Kamachej Diosniyku, k'acha kayniykita rikuchiwayku. Qan makiykoj ruwasqanta sinch'ita sayachiy, ari, makiykoj ruwasqanta sayachiy.