Salmos 9 - DIOSPA QHELQACHISQ

(1)

SALMO 9 Diosta justicia ruwasqanmanta yupaychana

(1) (Davidpa ruwasqan takiy)

¹ 1 (2) Tata Dios, tukuy sonqoywan yupaychasqayki, t'ukunata ruwasqaykimantapis parlasaj.

² 2 (3) Patapi Kaj Diosníy, qanrayku kusikusaj, tukuy sonqoywantaj sutiykita oqharispa takisaj.

³ 3 (4) Ñawpaqeykimanta awqaykuna ayqenku, urmaspataj, wañunku.

⁴ 4 (5) Qanqa cheqanta ruwaj Juez kaspa, kamachinayki tiyanapi tiyaykorqanki justiciata ruwanawaykipaj.

⁵ 5 (6) Qanman mana kutirikamusojkunatarí k'amerqanki. Millayta ruwaspa purejkunatapis chinkachillarqankitaj, kay pachamantataj sutinkutapis wiñaypaj chinkacherqanki.

⁶ 6 (7) Awqaykoqa wañunña, paywan khuskataj llajtankunapis thuñisqa, chay llajtakunamantataj niña pipis yuyarikunñachu.

⁷ 7 (8) Tata Diosqa wiñaypaj Kuraj Kamachejmin, Paytaj justiciata ruwananpaj kamachinan tiyanapi tiyasqaña kashan.

⁸ 8 (9) Payqa kay pachapi runakunata cheqantapuni juzganqa, maychus kajtataj justiciata ruwanqa.

⁹ 9 (10) Tata Diosqa ñak'arichisqa runakunata jark'akun, llakiypi rikhurejtinkupis, paykunata mana saqerparinchu.

¹⁰ 10 (11) Tata Dios, qanta rejsisojkuna qanpi atinikunku, imaraykuchus qan mask'asojkunataqa ni jayk'aj saqerparinkichu.

¹¹ 11 (12) Sionpi kamachej Tata Diosman takiychej, tukuy runamantaj ruwasqanmanta willamuychej.

¹² 12 (13) Tata Dios pichus runata wañuchejkunamanta cuentata mañanqa, ñak'arichisqa kajkunamantataj qhawarenqa. Jinallataj payqa llakiyniyojkunaj qhaparikusqankuta mana qonqanchu.

¹³ 13 (14) Tata Dios, noqamanta khuyarikuway. Qhawariy imaynatachus chejnikuwajkuna llakichiwasqankuta. Wañuy patapi kashajtiy, orqhoway.

¹⁴ 14 (15) Ajinamanta Jerusalén llajtaj punkunpi qan yupaychanapaj jina kasqaykita willasaj, qhespichiwasqaykimantataj kusikusaj.

¹⁵ 15 (16) Diosman mana kutirikojkunarí allasqanku t'oqollamantaj urmanku, jap'inapaj ch'ipata churallasqankupitaj chakinkutapis jap'ichikunku.

¹⁶ 16 (17) Tata Diosqa cheqan justiciata ruwaj kasqanwan rejsichikun. Millayta ruwaspa purejkunarí ruwasqallankupitaj urmanku.

¹⁷ 17 (18) Millayta ruwaspa purejkuna, Diosman mana kutirikojkuna ima jallp'aj sonqonman yaykonqanku, Diosmanta qonqapusqankurayku.

¹⁸ 18 (19) Pisi tiyapuyniyojkunarí manapuni qonqasqachu kanqanku. Imatachus suyakusqankupis mana wiñaypaj chinkanqachu.

¹⁹ 19 (20) Tata Dios, sayariy, runa wapuykachananta ama saqeychu. Qanman mana kutirikamojkunatapis juzgay.

²⁰ 20 (21) Tata Dios, sonqonkuman manchachikuyta churay, paykunatataj reparachiy wañoj runalla kasqankuta.