Salmos 89 - DIOSPA QHELQACHISQ

(1)

SALMO 89 Tata Diosqa Davidwan tratota ruwan

(1) (Etán ezraitaj ruwasqan takiy)

¹ 1 (2) Tata Dios, wiñaypaj khuyakuyniykimanta takillasajpuni. Qhepata jamojkunamanpis cheqan kasqaykimanta willallasajpuni.

² 2 (3) Khuyakuyniyki wiñaypaj kasqanmanta willasaj. Nisqaykita junt'aj kasqaykeqa janaj pacha jina mana kuyurej kasqanmanta parlasaj.

³ 3 (4) Qan, Tata Dios, nerqanki: Ajllakusqaywan uj tratota ruwarqani. Kamachiy Davidman tiluspa, ajinata nerqani:

⁴ 4 (5) Mirayniykimanta uj kuraj kamachej wiñaypaj kallanqapuni, kamachinayki tiyanataj wiñaypaj sayanqa, nispa.

⁵ 5 (6) Tata Dios, janaj pachapi kawsajkuna t'ukuna ruwasqaykimanta jatunchasonqanku. Ajllakusqaykikunaj tantakuyninkupi cheqan kayniykimanta jatunchasullanqankutaj.

⁶ 6 (7) Ni ima diospis, ni pipis janaj pachapi kajkunamanta, Tata Dios, qanwan kikinchakusunkimanchu.

⁷ 7 (8) Qanqa Diosmin kanki, manchachikunataj, janaj pachapi kawsajkuna ukhupi may jina atiyniyoj.

⁸ 8 (9) Tukuy Atiyniyoj Tata Dios, pitaj qan jina atiyniyojri? Tukuy atiy qanpata, cheqa kajwantaj muyuykusqa kanki.

⁹ 9 (10) Mama qochaj phiñakuyninta qan kamachinki. May jinata qhollchoqeyajtinpis, qanqa tiyaykuchinki.

¹⁰ 10 (11) Chantá mama qochapi jatun sierpeta chakiykiwan saruspa, wañusqata jina ruwarqanki, awqaykikunatataj makiykej kallpanwan ch'eqeracherqanki.

¹¹ 11 (12) Janajpis, kay pachapis qanpata kanku. Qanmin kay pachata ruwarqanki, tukuy ima chaypi kajtapis.

¹² 12 (13) Qanqa wichaynejta, uraynejtapis ruwarqanki. Chantá Tabor orqowan, Hermón orqowanpis kusisqa sutiykita jatunchanku.

¹³ 13 (14) Makiykeqa sinch'i atiyniyojmin, paña makiykitaj atipananpaj kallpayojmin.

¹⁴ 14 (15) Kamachinayki tiyanaqa justicia patapi, cheqan kaj patapi ima sayachisqa. Munakuywan, cheqa kajwantaj ñawpaqeykita rinku.

¹⁵ 15 (16) Tata Dios, sutiykita yupaychaj aylloqa kusikuyniyojmin, pikunachus k'anchayniykej k'anchasqanpi purinku, chaykuna.

¹⁶ 16 (17) Paykuna qanwan tukuy tiempo kusikonqanku, justiciaykiwantaj jatunchasqa kanqanku.

¹⁷ 17 (18) Cheqapuni qanqa chay aylloj kallpan kanki, k'acha kaynintaj, qanpa k'acha kayniykiraykutaj atiyniykuta jatunyachinki.

¹⁸ 18 (19) Tata Diosqa jark'akuwajninchej. Israelpa Llimphu Kaj Diosnin, qan kuraj kamachejniyku kanki.

¹⁹ 19 (20) Uj kuti mosqoypi jina parlarqanki, qanta qhatisojkunatataj nerqanki: Uj wapu runata aylluymanta ajllakuni. Chantá payta pataman oqharerqani, yanaparqanitaj.

²⁰ 20 (21) David kamachiyta tarerqani, paytataj noqapaj t'aqaspa, aceitewan jawerqani.

²¹ 21 (22) Payta yanapasajpuni, atiyniywantaj payta kallpachasaj.

²² 22 (23) Awqankunaqa mana paywan maqanakoj sayaykonqankuchu, millayta ruwajkunapis manallataj payta atipanqankuchu.

²³ 23 (24) Aswanpis noqa awqankunata paypa rikunanta sarusaj, payta chejnikojkunatapis wañuchisaj.

²⁴ 24 (25) Cheqa kayniy, chantá munakuyniy ima paywan khuska kanqa. Noqaraykutaj atiynin jatunyanqa.

²⁵ 25 (26) Mama qochamantapacha Éufrates mayukama kamachiyninta jatunyachisaj.

²⁶ 26 (27) Pay niwanqa: Qan Tatay kanki, Diosniy, qhespichiwajniy, jark'akuwajniy ima, nispa.

²⁷ 27 (28) Noqataj payta kuraj kaj churiy kananpaj churasaj, jinataj kay pachapi tukuy kuraj kamachejkunaj patankupi kanqa.

²⁸ 28 (29) Paypaj munakuyneyqa wiñaypaj kallanqapuni. Paywan trato ruwasqaypis kikillanpuni kanqa.

²⁹ 29 (30) Paypa mirayninmanta kuraj kamachejqa kallanqapuni, janaj kanankamataj kamachillanqapuni.

³⁰ 30 (31) Sichus paypa miraynin kamachisqaykunata saqenkuman, nitaj kamachisqayman jinachu kawsankuman chayqa,

³¹ 31 (32) jinallataj kamachisqaytachus p'akispa, mana junt'ankumanchu chayqa,

³² 32 (33) noqaqa kamachisqayta p'akisqankumanta varawan jasut'isaj, millayta ruwasqankumantataj paykunata seq'oykusaj.

³³ 33 (34) Chaywanpis noqa Davidta munakullasajpuni, jinataj payman imatachus nisqayta junt'allasajpuni.

³⁴ 34 (35) Noqaqa trato ruwasqayta mana p'akisajchu, nitaj nisqayta qonqasajchu.

³⁵ 35 (36) Noqa uj kutillata may llimphu kayniyrayku tilorqani, manataj Davidman llullakusajchu.

³⁶ 36 (37) Paypa mirayninmanta kajqa cuentanmanta kamachillanqapuni, kamachinan tiyanataj inti jina ñawpaqeypi kallanqapuni.

³⁷ 37 (38) Kamachiynenqa killa jina wiñaypaj sayanqa, janaj kanankamataj kallanqapuni, nispa.

³⁸ 38 (39) Chaywanpis kunan qan ajllakusqayki kamachejta qhesachanki. Payta pisipaj qhawanki, paywantaj phiñakorqanki.

³⁹ 39 (40) Kamachiykiwan trato ruwasqaykita p'akerqanki, pilluntataj pampaman choqarqanki.

⁴⁰ 40 (41) Tukuy perqanta thuñerqanki, llajtankunatapis raqayman tukucherqanki.

⁴¹ 41 (42) Chayrayku tukuy chaynejta purejkuna paymanta suwaranku, muyuyninpi kajkunataj asipayanku.

⁴² 42 (43) Qan awqankunaj atiyninkuta jatuncharqanki, jinallataj paykunata mayta kusicherqanki.

⁴³ 43 (44) Kamachiykej espadanta muthuman tukucherqanki, manataj awqankunawan maqanakupi payta yanaparqankichu.

⁴⁴ 44 (45) Jatun kayninta chinkacherqanki, kamachinan tiyanatataj pampaman wijch'orqanki.

⁴⁵ 45 (46) Jinallataj mayk'a unaytachus kawsananta pisiyacherqanki, p'enqaywantaj junt'acherqanki.

⁴⁶ 46 (47) Tata Dios, mayk'ajkamataj noqamanta pakakunkiri? Phiñakuyniykeqa nina jina lawrallanqapunichu?

⁴⁷ 47 (48) Tata Dios, yuyariy pisi kawsayniyojlla kasqayta. Ruwasqayki runaqa mana unaytachu kawsan.

⁴⁸ 48 (49) Mana pipis mana wañuspaqa kawsallanqapunichu, wañuypa atiyninmantaqa ni pipis ayqeyta atinmanchu.

⁴⁹ 49 (50) Tukuyta Kamachej Dios, maypitaj kashan mana tukukoj munakuyniykiri? Maytaj cheqa kayniykipi Davidman tilusqaykiri?

⁵⁰ 50 (51) Tukuyta Kamachej Dios, yuyarikuy kamachiykikunata runakuna alqorakusqankuta. Sonqota nanachinapaj jina parlasqankuta sonqollaypi waqaychani.

⁵¹ 51 (52) Tata Dios, chay jinata awqaykikuna sonqoykuta nanachiwayku, ajinata mayllapipis ajllakusqayki kamachejta nanachinku.

⁵² 52 (53) Tata Dios wiñaypaj yupaychasqa kachun. Ajina kachun.