Salmos 86 - DIOSPA QHELQACHISQ

1a

SALMO 86 Qanlla Diosniy kanki

1a (1a) (David Diosmanta mañakun)

¹ (1b) Tata Dios, uyarillaway, imaraykuchus ancha llakisqa, wajchataj kashani.

² Kawsayniyta waqaychay, imaraykuchus qanta kasuspa purini. Qanmin Diosniy kanki. Chayrayku qanpi atinikuspa kawsaj kamachiykita qhespichiy ari.

³ Tukuyta Kamachej Diosníy, noqamanta khuyarikuway, imaraykuchus tukuy tiempo qanta wajyakuyki.

⁴ Tukuyta Kamachej Diosníy, sonqoyta kusichiy, imaraykuchus qanmanta mañakuyki.

⁵ Tukuyta Kamachej Dios, qan k'acha kanki, runaj juchanta qhespichiyta yachanki, qanta wajyakojkunapajtaj jatun munakuyniyoj kanki.

⁶ Tata Dios, uyariy mañakususqayta, qhaparikamususqayta uyarillaway, ari.

⁷ Llakiyniypi qanman qhaparikuyki, imaraykuchus qan uyariwanki.

⁸ Tukuyta Kamachej Diosníy, qan jina diosqa mana waj kanchu, ruwasqaykita jinaqa mana pipis ruwanmanchu.

⁹ Tukuyta Kamachej Dios, sayarichisqayki suyukuna jamuspa, qanta yupaychasonqanku, sutiykitataj jatunchanqanku.

¹⁰ Ajinata ruwanqanku, imaraykuchus qanllamin atiyniyoj Dios kanki, manchayta t'ukuna imakunatataj ruwanki.

¹¹ Tata Dios, ñanniykipi puriyta yachachiway, qanta kasuspa purinaypaj. Sonqoypi kay jinata munanalla kachun: Qanllata yupaychasuyta munana.

¹² Tukuyta Kamachej Diosníy, tukuy sonqo qanta yupaychasqayki, wiñaypajtaj sutiykita jatunchasaj,

¹³ imaraykuchus munakuyniykeqa noqapaj may jina. Qanqa jallp'aj sonqonman urmanaymanta kacharichiwarqanki.

¹⁴ Diosníy, may kasqankuta yuyakojkunaqa contraypi oqharikuspa, wañuchiwayta munanku. Paykuna mana qanmanta yuyarikunkuchu.

¹⁵ Qanrí, Tukuyta Kamachej Dios, khuyakoj sonqoyoj kanki, mana usqhayta phiñarparikoj, may jina munakuyniyoj, cheqa kajtaj.

¹⁶ Noqata qhawarimuway, khuyarikuwaytaj. Kallpachaway, qhespichiwaytaj, imaraykuchus kamachiykej wawan kani.

¹⁷ Noqawan k'acha kasqaykimanta señalta rikuchiway. Chayta rikuspa, chejnikuwajkuna p'enqachisqa kanqanku, imaraykuchus qan, Tata Dios, sonqochawanki, yanapawankitaj.