Salmos 74 - DIOSPA QHELQACHISQ

1a

SALMO 74 Dios ayllunta kacharichinanta mañakuna

1a (1a) (Asafpa ruwasqan yarawi)

¹ (1b) Diosníy, imaraykutaj kay jina unayta qhesachawaykuri? Imaraykutaj phiñakuyniyki k'ajarin tropaykimanta ovejaykikunaj contrantari?

² Aylluykimanta yuyarikuy, unaymantapacha rantikusqaykimanta. Qanqa preciota pagaspa, paykunata aylluyki kanankupaj kacharicherqanki. Maypichus tiyakorqanki, chay Sión orqomantapis yuyarikuy.

³ Jamuy ari, t'ukunata Jerusalén llajta thuñisqa kasqanta qhaway. Imaynatachus awqaqa yupaychana wasiykipi tukuy imata thuñisqanta reparay.

⁴ Awqaykikunaqa yupaychana wasiykipi atipasqankumanta takinku, wiphalankutataj señalta jina sayachinku.

⁵ Montepi llant'ata ch'ejtajkuna jina jachawan tukuy imata llant'aykunku.

⁶ Jachawan, martillowan ima wajtaspa, k'ullupi t'illmisqa warawakunata p'akerqanku.

⁷ Paykuna Temploykita ninawan ruphaykucherqanku, tiyakunayki wasitataj manakajman tukucherqanku.

⁸ Sonqonkupi nerqanku: Ujkama tukuy imata thuñiykunachej, nispa. Chantá llajtantinpi tukuy yupaychana cheqakunata ruphaykucherqanku, maypichus tantakuspa qanta yupaychasoj kayku, chaykunata.

⁹ Manaña wiphalaykuta rikuykuchu. Noqayku ukhupi Diosmanta sut'inchajkunapis manaña kankuchu. Chantá chay tukuy mayk'ajchus tukukunanta mana pipis niyta atiwaykuchu.

¹⁰ Diosníy, mayk'ajkamataj awqakuna turiyawasqaykuri? Mayk'ajkamataj mana allinta qanmanta parlanqankuri?

¹¹ Imaraykutaj atiyniyoj makiykita pakaykunkiri? Imajtintaj mana imatapis ruwankichuri?

¹² Diosníy, qanqa unaymantapachapuni Kuraj Kamachejniy kanki. Qanmin kay suyuta qhespichej kanki.

¹³ Qan atiyniykiwan mama qochata t'aqarqanki. Chay mama qochapi jatuchaj sierpekunaj umankutapis qanllataj p'akerqanki.

¹⁴ Leviatán jatun sierpej umankunata ñat'orqanki, aychantataj ch'innejpi k'ita animalkunaman qaraykorqanki.

¹⁵ Juturikunata, mayukunata ima qan rikhuricherqanki. Ni jayk'aj ch'akej jatun mayukunata qanllataj ch'akicherqanki.

¹⁶ Qanpata p'unchaypis, tutapis. Qanmin killata, intitapis churarqanki.

¹⁷ Qan kay pachaman mojonninta churarqanki. Chantapis chiri mit'ata, q'oñi mit'atapis churallarqankitaj.

¹⁸ Yuyarikuy, Tata Dios, awqaykej phiñachisusqanmanta, wampu runakunataj sutiykita manakajpi rikhurichisqankumanta ima.

¹⁹ Ama ari chay jinatapuni aylluykita qonqawaykuchu. Noqaykoqa jurk'uta jina pisi kallpa kayku. Ama k'ita animalkunaman qaraykuwaykuchu.

²⁰ Trato ruwasqaykimanta yuyarikuy, imaraykuchus suyuykupeqa maqanakuylla junt'a.

²¹ Ama munaychu ñak'arichisqa runakuna ujtawan p'enqachisqa kanankuta. Manachayqa wajcha runakuna, llamp'u sonqoyojkunapis sutiykita yupaychasuchunku.

²² Diosníy, sayariy, qanmanta parlaspa kutichikuy. Yuyarikuy wampu runakuna sapa p'unchay mana sayk'uyta phiñachisusqankuta.

²³ Ama qonqaychu awqaykikunaj qhaparisqankuta, imaraykuchus contraykipi oqharikojkunaj ch'ajwasqankoqa astawan yapakushan.