Salmos 73 - DIOSPA QHELQACHISQ

1a

SALMO 73 KINSA KAJ T'AQA SALMOKUNA ( Sal 73—89 ) Tata Diosqa manchay k'achamin

1a (1a) (Asafpa ruwasqan takiy)

¹ (1b) Cheqapuni Diosqa Israelpaj manchay k'acha, tukuy llimphu sonqoyoj kajkunapajpis.

² Noqaqa yaqhalla llusk'aspa, urmanaypaj jinaña kasharqani. Chakeyqa yaqhalla llust'arqa.

³ Millayta ruwaspa purejkuna, chantá runaykachajkuna ima qhapajyasqankuta rikuspa, noqa paykunamanta envidiaykorqani.

⁴ Paykuna wañunamanta mana llakikunkuchu, manchay qhalilla purinku.

⁵ Manallataj ujkuna jinapunichu llakiykunata ñak'arinku, nitaj wajkuna jinachu uma nanaykunata rikunku.

⁶ Chayrayku runaykachanaqa paykunapaj walqa jina, atiyniyoj kasqankupi atinikuspa, millay ruwasqankupis p'achanku jina.

⁷ Paykuna chhika wira kasqankurayku ñawinkupis phawashanña. Sonqonkoj munasqanta ruwankupuni.

⁸ Alqorakuspa, millayta ruwanamanta parlanku, runaykachaspataj, wajkunata saruyta munanku.

⁹ Siminkuwanqa paykuna Diosta phiñachinku, parlaspataj, tukuy kay pachapaj mana allin kajta rimanku.

¹⁰ Chayrayku waj runakuna paykunaman tapurikoj rinku, tukuy nisqankutapis ch'inmanta jap'ikunku.

¹¹ Paykuna ninku: Dios yachanmanchu? Patapi Kajqa reparanmanchu? nispa.

¹² Qhawaychej ari chay millayta ruwajkunata: Paykuna mana imamanta llakikuspa, astawan qhapajyarinku.

¹³ Ajina kajtenqa, llimphu sonqo kawsakusqayqa yanqhalla, yuyayniyta ch'ichi yuyanamanta qhawasqaypis qhasi manakajlla.

¹⁴ Chayta ruwaspapis, noqaqa sapa p'unchay seq'osqa kani, sapa paqarintaj jasut'iwanku.

¹⁵ Sichus paykuna jinallataj yuyayman karqa chayqa, Diospa wawankunata wasanchayman karqa.

¹⁶ Chaywanpis chaymanta entiendeyta munaspa, noqa mana yachayta aterqanichu, mana entiendey atina karqa.

¹⁷ Chantá maypachachus Diospa yupaychana wasinman yaykorqani chaypachalla, imapichus paykuna tukukunanku kashan, chayqa umayman yaykuwarqa.

¹⁸ Tata Dios, cheqapuni paykunata llust'anaman churarqanki, sonqo nanay khuyayllata kawsanamantaj tanqaykunki.

¹⁹ Paykunaqa uj ñawi ch'irmiypi pampachasqa rikhurenqanku, manchachikuytaj paykunata tukuchenqa.

²⁰ Imaynatachus runa mosqokuspa ujllata rijch'arin, ajinata rijch'arispa, Tukuyta Kamachej Dios, paykunata chinkarparichinki.

²¹ Noqaqa ancha llakisqa karqani, sonqoytaj t'ojsisqa jina nanarqa.

²² Mana yuyayniyoj wampu runa karqani, ñawpaqeykipitaj uywa jina karqani.

²³ Chay tukuywanpis, qanwanpuni karqani. Paña makiymantataj jap'iwarqanki.

²⁴ Qanqa yuyaychawasqaykiwan cheqan ñanta pusawarqanki, chaymantataj mayta jatunchaspa jap'ikapuwanki.

²⁵ Piniytaj janaj pachapi tiyapuwanri? Qanlla noqajta kapuwanki. Qanwan kaspaqa, kay pachapi manaña imatapis munanichu.

²⁶ Ukhuypis, sonqoypis pisi kallpaman tukushan chaypis, Diosneyqa wiñaypaj chayaqey, sonqoyta kallpachawajniytaj.

²⁷ Diosníy, qanmanta karunchakojkuna wañonqanku, qanta mana qhatisojkunatataj qan chinkarparichinki.

²⁸ Noqarí Diosman qayllaykusaj. Noqapajqa chaymin aswan sumaj. Tukuyta Kamachej Tata Dios, qanmin pakakunay kanki, noqataj tukuy ruwasqaykimanta tukuyman willasaj.