Salmos 71 - DIOSPA QHELQACHISQ

SALMO 71 Machu runa Diosmanta mañakun

¹ Tata Dios, waqaychanawaykipaj qanman jamuni. Ama jayk'ajpis p'enqachisqa kanayta munaychu.

² Yanapawaj jamuy, kacharichiwaytaj, imajtinchus qanqa cheqanta ruwajmin kanki. Mañakusqayta uyariwaspa, qhespichiway ari.

³ Qanqa pakakunay chhanka kay, chaypi sapa kuti pakakuyta atinaypaj. Qanllamin qhespichisqa kanayta kamachiyta atinki, imaraykuchus qan pakakunay chhanka kanki, kallpachawayniytaj.

⁴ Diosníy, millayta ruwajkunaj makinmanta kacharichiway. Jinallataj kallpanpi atinikuspa, maqayllata munaj runamantapis qhespichillawaytaj.

⁵ Tukuyta Kamachej Diosníy, wayna kasqaymantapacha qanlla yanapanawaykita suyakuni, qanllapitaj atinikuni.

⁶ Mamaypa wijsanpi kashaspallaraj, qanllapi atinikoj kani. Qanllamin mamaypa wijsanmanta paqarichiwarqanki. Chayrayku noqa wiñaypaj jatunchallasqaykipuni.

⁷ Ashkha runakuna t'ukuspa qhawananku kani, qantajrí sumaj pakakunay kanki.

⁸ Sapa p'unchay jatun kayniykej lliphipiyninmanta takiykunawan simeyqa junt'a kashan.

⁹ Machuyajtiy, ama manakajpaj qhawawaychu. Manaña kallpayoj kajtiypis, ama saqerpariwaychu.

¹⁰ Awqaykunaqa noqamanta mana allintachu parlanku, ujchaykukuspataj, wañuchinawankupaj yachachinakunku.

¹¹ Paykuna ninku: Qhatiykachaspa, payta jap'inachej, imaraykuchus Dios payta saqerparin, manataj pipis yanapaj kanchu, nispa.

¹² Diosníy, ama noqamanta karunchakuychu, yanaparinawaykipaj usqhayta jamuy.

¹³ Awqaykuna p'enqaypi, chinkachisqataj rikhurichunku. Mana allinniyta munapuwajkunapis p'enqaypi rikhurichisqallataj kachunku.

¹⁴ Noqarí, sapa p'unchay qanlla yanapanawaykita suyakusqayki, astawan astawantaj jatunchasqayki.

¹⁵ Tukuy p'unchayta justiciaykimanta parlasaj, qhespichiwasqaykimanta ima willarasaj. Chaykunaqa mana yupay atinamin kanku.

¹⁶ Tukuyta Kamachej Tata Diosníy, jatuchaj imakunata ruwasqaykimanta parlasaj. Qanllamin cheqan kasqaykimanta tukuyman willarasaj.

¹⁷ Diosníy, wayna kasqaymantapacha qan yachachiwarqanki. Kunankamapis t'ukuna imakunata ruwasqaykimanta willashallanipuni.

¹⁸ Allin machituña yuraj umaña kashajtiypis, Diosníy, amapuni saqerpariwaychu, imajtinchus may jina atiyniyoj kasqaykimanta kunan kashajkunaman, jinataj qhepanejman kajkunaman willanayraj kashan.

¹⁹ Justiciaykeqa, Diosníy, janaj pachakama chayan, imajtinchus qanqa t'ukunapaj jina ruwarqanki. Qan jinaqa mana pipis kanchu.

²⁰ Ashkha llakiykunata, mana allin kajtapis ñak'arinayta munarqanki chaypis, watej kawsachillawankitaj. Jallp'aj sonqonmantapachapis ujtawan sayarichillawankitaj.

²¹ Qanqa astawanraj jatunchawanki, uj kutitawanraj sonqochallawankitaj.

²² Chayrayku Diosníy, Israelpa may llimphu kaj Diosnin, nisqaykita junt'aj kasqaykirayku, noqa arpawan, chantá waj cuerdayoj tocanakunawan ima qanta jatunchaspa takisaj.

²³ Kusiymanta qhaparispa, qanman takisaj, imaynatachus qan preciota pagaspa kacharichiwasqaykimanta tukuy sonqo takisaj.

²⁴ Jinallataj p'unchaynintin simiypis justiciaykimanta parlanqa, imaraykuchus noqapaj mana allin kajta munajkunaqa p'enqaypi rikhurichisqa karqanku.