Salmos 53 - DIOSPA QHELQACHISQ

(1)

SALMO 53 Runaj sonqonqa millayman tukun

(1) (Davidpa ruwasqan yarawi)

¹ 1 (2) Wampukunaqa sonqonkupi ninku: Mana Dios kanchu, nispa. Tukuyninku juchallinaman qosqa sonqoman tukunku, imatachus ruwasqankutaj millachikunamin. Mana ujpis allinta ruwajqa kanchu.

² 2 (3) Janaj pachamantapacha Diosqa runakunata qhawamun yuyayniyoj runata, chantá pichus Diosta mask'ajta tariyta munaspa.

³ 3 (4) Chaywanpis tukuyninku cheqan ñanmanta pantaykunku, tukuyninkutaj mana allin sonqoyojman tukunku. Mana pipis allin kajta ruwajqa kanchu. Ni ujllapis kanchu.

⁴ 4 (5) Mana allinta ruwajkunaqa mana yuyayniyoj kanku, pikunachus aylluyta t'antata jina mikhukapunku, Tata Diospa sutintataj mana oqharillankupischu, chaykuna.

⁵ 5 (6) Aswan qhepamanrí ni imata manchachikunapaj kashajtinpis, paykuna manchachikuspa kharkatitenqanku. Diosqa qanta maqayta munasojkunaj tullunkuta qhalliranqa. Paykuna p'enqaypi rikhurenqanku, imajtinchus Tata Dios paykunata qhesachan.

⁶ 6 (7) Mayta munayman Sión orqomanta pipis jamunanta Israelta qhespichinanpaj. Chantá Dios ayllunta kacharichispa pusakampojtin, Jacobpa miraynin kusikonqanku, pikunachus Israel ayllumanta kanku, chaykuna.