Salmos 52 - DIOSPA QHELQACHISQ

(1)

SALMO 52 Millayta ruwajqa qhasi manakajta jatunchakun

(1) (Davidpa ruwasqan yarawi)

¹ 1 (3) Atiyniyoj runa, imaraykutaj millayta ruwasqaykimanta runaykachankiri? Diospa khuyakuynenqa mana tukukuyniyojmin.

² 2 (4) Qantajrí mana allin kajta ruwanallapipuni yuyanki. Qalluykeqa sumaj filochasqa khuchuna jina, qantaj llullakunapaj churasqa kanki.

³ 3 (5) Allinta ruwanaykitaqa, astawan mana allin kajta ruwayta munanki. Cheqanta parlanaykitaqa, astawan llullakuyta munanki.

⁴ 4 (6) Llulla simi runa, qanqa sonqota k'arachinapaj jina parlaspa misk'irichikunki.

⁵ 5 (7) Chayrayku Dios wiñaypaj chinkarparichisonqa. Jap'isuspa, wasiykimanta wijch'usonqa, kay pachamantataj t'irasonqa.

⁶ 6 (8) Chantá cheqan runakuna chayta rikuspa, manchachikonqanku, chay runamanta asikuspataj, kay jinata nenqanku:

⁷ 7 (9) Qhawaychej ari, Diospi pakakuyta mana mask'aj runata. Qhawaychej tiyapuynillanpi atinikoj runata. Payqa millayta ruwayta munasqanmanta mana kuyurerqachu, nispa.

⁸ 8 (10) Noqarí q'omer olivo sach'a jina Diospa wasinpi kani. Diospa khuyakuyninpi noqaqa wiñaypaj atinikusajpuni.

⁹ 9 (11) Tukuy ruwasqaykimanta, Diosníy, wiñaypaj pachis nisqayki. Noqaqa kasusojkunaj ñawpaqenkupi qanpi atinikusaj, imaraykuchus qan k'acha kanki.