Salmos 51 - DIOSPA QHELQACHISQ

(1)

SALMO 51 Tata Dios khuyarikuway ari

(1) (Davidpa ruwasqan takiy)

¹ 1 (3) Diosníy, mana tukukoj munakuyniykirayku noqamanta khuyarikuway. Khuyaj sonqo kasqaykirayku tukuy juchayta pampachay ari.

² 2 (4) Tukuy millay ruwasqaymanta mayllaway, juchaymantataj llimphuchaway.

³ 3 (5) Noqaqa mana kasukuyta munaj kasqayta rejsikapuni, juchallisqaytapis mana qonqayta atinichu.

⁴ 4 (6) Noqaqa contraykita, qanpa contrallaykita juchallikorqani, imatachus millachikusqaykita ruwaspa. Chayrayku nisqaykeqa cheqan, juchachawaspataj, mana pantankichu.

⁵ 5 (7) Paqarisqaymantapacha juchallinaman aysasqa sonqo kasqayta yachani. Mamaypa wijsanmantapacha noqa juchasapa kani.

⁶ 6 (8) Cheqatapuni qanqa cheqan sonqoyoj runata munakunki, sonqoypitaj yachayniyoj kayta yachachiwarqanki.

⁷ 7 (9) Hisopo qhorawan llimphuchaway, llimphutaj kasaj. Mayllaway Tata Dios, noqataj rit'imanta aswan yuraj kasaj.

⁸ 8 (10) Tata Dios, jatun kusikuywan junt'achiway. Mayta ñak'arichiwarqanki chaypis, kunan watej kusichiway.

⁹ 9 (11) Juchayta ama qhawaychu, aswanpis tukuy millay ruwasqayta qonqayman churay.

¹⁰ 10 (12) Diosníy, llimphu sonqota ruwaway. Cheqan sonqoyoj kanaypaj tukuy kayniyta mosojyachiway.

¹¹ 11 (13) Ñawpaqeykimanta ama wijch'uwaychu, amataj Santo Espirituykita qhechuwaychu.

¹² 12 (14) Qhespichiwasqaykimanta kusikuyta watej kutichimpuway. Chantá qanta kasukuyta munana sonqota ruwaway,

¹³ 13 (15) mana kasukuyta munajkunaman kamachisqaykita yachachinaypaj, juchasapakunataj qanman kutirikamusunankupaj.

¹⁴ 14 (16) Runata wañuchisqaymanta qhespichiway, qhespichiwajníy, Diosníy, noqataj kusiywan takispa, cheqanta ruwaj kasqaykimanta willasaj.

¹⁵ 15 (17) Tukuyta Kamachej Diosníy, simiyta kichariy, simiywan qanta jatunchasunaypaj.

¹⁶ 16 (18) Mana qanqa uywa ñak'asqa jaywanata munankichu, nitaj uywata ñak'aspa q'olachisqaytapis jap'ikuwankimanchu.

¹⁷ 17 (19) Manachayqa k'umuykoj sonqo kanayta munanki. Qanqa Diosníy, tukuy sonqo k'umuykojta, chantá qanman kutirikamusojta mana qhesachankichu.

¹⁸ 18 (20) K'acha munayniykirayku allin kajta Sionpaj ruway. Jerusalén llajtaj perqanta watej sayarichillaytaj.

¹⁹ 19 (21) Chaypacha qan kusiywan jap'ikunki tukuy sonqo jaywasusqankuta, uywa ñak'asqa q'olachinata, waj jaywanakunata ima. Chaypachataj altarniykipi torillota ñak'aspa jaywasonqanku.