Salmos 5 - DIOSPA QHELQACHISQ

(1)

SALMO 5 Tutamanta sayarispa mañakunapaj

(1) (Davidpa ruwasqan takiy)

¹ 1 (2) Tata Diosníy, parlasqayta uyariway, ayqospa mañakususqayta uyariway.

² 2 (3) Kuraj kamachejníy, Diosníy, qhaparikuspa mañakususqayta uyariway, imaraykuchus qanmanta mañakuni.

³ 3 (4) Tata Dios, tutamanta mañakusqayta uyariwanki. Chhapu chhaputa llakiyniyta willakusqayki, chantá kutichinawaykita suyasaj.

⁴ 4 (5) Qanqa mana millay kajta ruwanawan kusikoj Dioschu kanki, millayta ruwaspa purejkunatataj rikuyta mana atinkichu.

⁵ 5 (6) Jatunchakojkunaqa mana ñawpaqeykipi kayta atinkumanchu, qantaj mana allin ruwajkunata chejnikunki.

⁶ 6 (7) Qanqa llullakojkunatapis chinkachillankitaj. Tata Dios, qanqa runa wañuchejkunata, wasanchajkunata ima millachikunki.

⁷ 7 (8) Noqarí, munakuyniyki may jina kasqanrayku, wasiykiman yaykuyta atisaj. Temployki qhawarisqa qanta tukuy sonqo yupaychasqayki.

⁸ 8 (9) Awqaykuna muyuykuwasqankurayku, Tata Dios, cheqan kasqaykiman jina purichiway, cheqan ñanniykitataj pusaway.

⁹ 9 (10) Paykuna mana jayk'aj cheqanta parlankuchu. Sonqonkupeqa millay kajta ruwanalla junt'a. Siminkoqa kicharisqa covacha jina, q'otiyanankupajtaj wayllukunku.

¹⁰ 10 (11) Diosníy, paykunata jasut'iy, llullakuspa parlasqankutataj pantachiy. Anchata juchallisqankurayku paykunata ñawpaqeykimanta wijch'uy, imaraykuchus qanpa contraykita oqharikunku.

¹¹ 11 (12) Pikunachus qanta mask'asojkunarí, kusisqallapuni takirikuchunku, imajtinchus qanmin paykunata waqaychanki. Qanta munakusojkunaqa kusisqa kawsakuchunku.

¹² 12 (13) Tata Dios, cheqanta ruwajtaqa qan yanapanki, khuyakuyniykiwantaj jark'akuna escudowan jina payta waqaychanki.