Salmos 44 - DIOSPA QHELQACHISQ

SALMO 44 Llakiypi Tata Dios yanapananta mañakuna

(Corejta churinkunaj yarawin)

¹ 1 (2) Diosníy, noqayku uyarerqayku, tataykupis willallawarqaykutaj, unay paykuna kawsashajtinku, t'ukunata ruwasqaykimanta.

² 2 (3) Qanmin makiykiwan qanta mana manchachikoj runakunata wijch'orqanki. Chay suyupi tiyakojkunata sarorqanki, tataykukunatataj chayman churarqanki.

³ 3 (4) Tataykukunaqa manamin kallpankuwanchu jallp'ata jap'ikaporqanku, nitaj espadankuwanchu chaypi tiyakojkunata atiparqanku. Manachayqa atiyniyki, kallpayki, paykunawan kasqaykej k'anchaynin ima paykunata atipayta yanaparqa, qan paykunata munakusqaykirayku.

⁴ 4 (5) Qanmin Diosníy, Kuraj Kamachejniy kanki. Qanmin Jacobpa ayllunta atipanankupaj yanaparqanki.

⁵ 5 (6) Qanrayku awqaykukunata atiparqayku, noqaykuwan maqanakoj sayaykojkunatataj sutiykipi t'ustita ruwarqayku.

⁶ 6 (7) Noqaqa mana armaypichu atinikuni, manallataj espadaychu atipanapaj yanapawanqa.

⁷ 7 (8) Qanmin awqaykukunata atipayta yanapawarqayku. Chejnikuwayku, chaykunataqa qanmin p'enqayman churarqanki.

⁸ 8 (9) Diosníy, qanta sapa p'unchay yupaychasqayku, wiñaypajtaj sutiykita jatunchasqayku.

⁹ 9 (10) Kunanrí qan qhesachawayku, p'enqaypitaj rikhurichiwayku. Manañataj soldadoykunawanpis maqanakoj llojsinkichu.

¹⁰ 10 (11) Awqaykukunaj ñawpaqenta qan ayqechiwarqayku. Pikunachus chejnikuwayku, chaykuna suwawayku, tukuy imaykutapis munasqankuta apakapunku.

¹¹ 11 (12) Qanqa paykunaman jaywaykuwarqayku ñak'anapaj ovejapis kaykuman jinata, waj suyukunamantaj ch'eqerachiwarqayku.

¹² 12 (13) Aylluykitaqa chhalarparerqanki, vendespataj, mana ni imatapis ganarqankichu.

¹³ 13 (14) Qanqa muyuyniykupi kajkunaj ñawpaqenkupi p'enqaypi rikhurichiwayku, chay suyukunapi tiyakojkunataj asipayawayku, pisipajtaj qhawawayku.

¹⁴ 14 (15) Diosta mana manchachikojkuna asipayananta ruwawarqayku. Noqaykuta rikuspa, paykuna umankuta ikharispa, pisipaj qhawawayku.

¹⁵ 15 (16) Sapa p'unchay k'umuykachachisqallapuni kani. P'enqakuywantaj mana maymanpis uyayta churayta atinichu.

¹⁶ 16 (17) Awqaykunaqa pisipaj qhawaspa qhapariykuwanku, pagachikuytataj munanku.

¹⁷ 17 (18) Chay tukuy ima qhatiriwarqayku mana qanmanta qonqakojtiykupis, nitaj tratoykita p'akejtiykupis.

¹⁸ 18 (19) Qanmantaqa sonqoyku manapuni karunchakorqachu, nitaj chakiyku ñanniykimanta pantaykorqachu.

¹⁹ 19 (20) Qanrí, maypichus k'ita alqokuna kanku, chaypi saqerpariwarqayku, mancharina laqhayaykuywantaj qhataykuwarqayku.

²⁰ 20 (21) Qantachus qonqakuspa, waj dioskunata yupaychaykuman karqa chayqa,

²¹ 21 (22) qanqa chayta yachawajpuni karqa, imaraykuchus qanqa sonqoyku ukhupi imatachus yuyasqaykuta yachankipuni.

²² 22 (23) Chaywanpis noqayku qanrayku sapa p'unchay wañuy patapi kashayku, awqaykukunataj ñak'anapaj ovejata jina qhawawayku.

²³ 23 (24) Tukuyta Kamachej Diosníy, rijch'ariy ari, imaraykutaj puñushallankipuniri? Rijch'ariy ari. Ama wiñaypajqa qhesachawaykuchu.

²⁴ 24 (25) Imaraykutaj noqaykumanta pakakunkiri? Imaraykutaj ñak'arichisqa, chantá sarusqa kasqaykumanta qonqapunkiri?

²⁵ 25 (26) Noqayku atipasqa, k'umuykuchisqataj kashayku, pampata qhatatakuspataj purishayku.

²⁶ 26 (27) Tata Dios, sayariy, yanapanawaykupaj jamuy. Mana tukukoj munakuyniykirayku qhespichiwayku.