Salmos 4 - DIOSPA QHELQACHISQ(1)SALMO 4 Tata Diospi tukuy sonqo atinikuna (1) (Davidpa ruwasqan takiy) 1 1 (2) Qhaparikamusojtiy, uyarillaway, cheqanta ruwaj Diosníy. Ñak'ariypi ñit'isqa kashajtiy, qan samarichiwarqanki, kunantaj noqamanta khuyarikuspa, mañakusqayta uyariway. 2 2 (3) May kasqaykichejta yuyakoj runakuna, jayk'ajkamataj maypaj qhawasqa kanayta pisipaj qhawankichejri? Mayk'ajkamataj manakajta munakunkichej, mana cheqan kajtataj mask'ankichejri? 3 3 (4) Yachaychej Tata Diosqa nisqanta kasojkunata paypaj ajllakusqanta. Yachallaychejtaj payta wajyakojtiy, Tata Dios uyariwasqanta. 4 4 (5) Phiñakusqaykichejwan apachikuspa, ama juchallikuychejchu. Puñunaykichejpi sirikushaspa, sonqoykichejta qhawarikuychej. 5 5 (6) Jaywanaykichejtaqa maychus kajta Diosman jaywaychej, Tata Diospitaj sonqoykichejta churaychej. 6 6 (7) Ashkha ninku: Pitaj kusiy kawsayta rikuchiwasunri? nispa. Khuyakuywan qhawariwayku, Tata Dios. 7 7 (8) Qanmin jatun kusiyta qowarqanki, pikunachus ashkha trigoyoj, ashkha vinoyoj ima kaspa kusikunku, chaykunamantapis astawanraj. 8 8 (9) Chayrayku ni imamanta manchachikuspa siriykakapuni, puñukunitaj, imaraykuchus Tata Dios, qanmin mana ni imamanta manchachikuspa kawsachiwanki. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society