Salmos 39 - DIOSPA QHELQACHISQ

(1)

SALMO 39 Kawsayqa phuyu jinalla

(1) (Davidpa ruwasqan takiy)

¹ 1 (2) Noqa nerqani: Allinta qhawaspa imatapis ruwasaj, ama simiywan juchallikunaypaj. Millayta ruwaj runa ñawpaqeypi kanankama, simiyta watakusaj, nispa.

² 2 (3) Ch'inlla karqani, ni allin kajmantapis parlarerqanichu. Chaywanpis nanayneyqa astawan sinch'iyarqa.

³ 3 (4) Ukhuypi sonqoy t'impurerqa, chaymanta unanchajtiytaj, sonqoy lawrarerqa. Chayrayku sinch'ita parlaspa, nerqani:

⁴ 4 (5) Tata Dios, imaynatachus tukukunayta willariway, chantá mashkha unaytatajchus kawsanayta ima, kawsayniy mana unaychu kasqanta reparanaypaj.

⁵ 5 (6) Pisi kawsayta qan qowanki, ñawpaqeykipi kawsayneyqa manapis kanmanchu jina. Tukuy runaj kawsayninkupis samay jinalla tukukapullantaj.

⁶ 6 (7) Tukuy runaqa llanthu jinalla pasapunku. May jinata qhapajyanapis qhasi manakajlla, paykunataj mana yachankuchu pipajchus kananta.

⁷ 7 (8) Jina kajtenqa, Tukuyta Kamachej Dios, imatañataj suyakuymanri? Qanlla yanapanawaykita suyakuni.

⁸ 8 (9) Tukuy juchallisqaymanta kacharichiway. Wampu runakuna ama noqamanta asikunankuta saqeychu.

⁹ 9 (10) Ujtawanpis ch'inlla karqani, manataj parlarerqanichu, imajtinchus qan imatachus ruwanaykita nisqaykimanta mana pipis cuentata mañasonqachu.

¹⁰ 10 (11) Karunchay noqamanta jasut'iyniykita, imaraykuchus makiykej maqasqanwan tukukushaniña.

¹¹ 11 (12) Qanmin runataqa juchallisqanmanta jasut'ispa, cheqan ñanman churanki, imatachus astawan munakusqantataj thuta jina tukuchinki. Tukuy runaqa uj samay jinalla kanchej.

¹² 12 (13) Tata Diosníy, mañakusqayta uyariway, waqaspa qhaparikamusqaytapis. Waqasqayta rikuspa, ama ch'inlla kakuychu. Qanpajqa waj llajtayoj jina kani, ñan purej runa jinalla, ñawpa tataykukuna jinataj.

¹³ 13 (14) Ama jinata qhawawayñachu, uj chhikallantapis samarichiway, manaraj ripuspa chinkaripushajtiy.