Salmos 35 - DIOSPA QHELQACHISQ

1a

SALMO 35 Tata Dios mañakusqanchejta uyarin

1a (1a) (Davidpa ruwasqan takiy)

¹ (1b) Tata Dios, contraypi sayaykuwajkunamanta jark'away. Qanmin maqanawankupaj sayaykuwajkunawan maqanakuy.

² Jark'akuna escudoykita oqharikuspa, yanapawaj usqhayllata jamuy.

³ Lanzaykita oqharikuspa, qhatiykachawajkunaj contrankupi sayaykuy. Niway qanmin qhespichiwajniy kasqaykita.

⁴ Pikunachus wañuchiyta munawajkuna p'enqachisqa, pawisqataj ayqechunku. Mana allinta ruwawayta munajkunapis p'enqachisqallataj ayqechunku.

⁵ Paykunataqa Tata Diospa angelnin wijch'uchun wayraj apaykachasqan q'opata jina.

⁶ Purisqanku ñanpi jayt'akuspa urmachunku, llusk'achunkutaj. Tata Diospa angelnintaj paykunata qhatiykachachun.

⁷ Paykunaqa mana imallamanta tojllata churawarqanku. Mana imallamanta uj t'oqota allarqanku noqa chaypi urmanaypaj.

⁸ Chayrayku kaymanta jinalla phutiy, waqana ima paykunata qhatirichun, churapuwasqanku tojllallapitaj urmachunku. Jatun llakiywan tukukuspataj, paykuna chinkachisqa kachunku.

⁹ Chaypacha noqaqa Tata Diospi kusikusaj, pay qhespichiwasqanrayku.

¹⁰ Tukuy sonqo nisaj: Tata Dios, pitaj qan jinari? Qanqa wajchakunata, llakichisqa kajkunata ima paykunamanta aswan atiyniyojkunamanta kacharichinki, nispa.

¹¹ Millay sonqoyoj testigokuna sayarimunku, mana yachasqaymantataj tapuwanku.

¹² Allin ruwasqaymanta sajra kajwan kutichiwanku, chaytaj sonqoyta nanachin.

¹³ Paykuna onqojtinkoqa, noqa paykunarayku llakikoj kani. Ayunaspa, qhashqa p'achata churakoj kani, sonqoy ukhupitaj Tata Diosmanta paykunarayku mañapoj kani.

¹⁴ Llakisqa, umphullataj purej kani, mamaymantapis llakisqa kashayman jina, kawsaqeymanta, chayrí kikin wawqeymantapis llakisqa kashayman jina.

¹⁵ Noqa urmajtiyrí, noqamanta tukuy asikorqanku, mana rejsisqay, waj runapis kankuman jina. Chantá mana samarispa, maqawarqanku.

¹⁶ Ñak'arichiwarqanku, noqamantataj alqochakorqanku, ñawinkuwan leqhowaspataj, qhamurakorqanku.

¹⁷ Tukuyta Kamachej Dios, mayk'ajkamataj kay jina kananta qhawallankiri? Kay k'ata kawsayniyta qhespichiway ari, phiña leonkuna jina purejkunamanta.

¹⁸ Chantá aylluykej tantakuynin ukhupi pachis nispa, nisqayki. Ashkha runaj ñawpaqenpitaj yupaychasqayki.

¹⁹ Awqaykuna noqamanta asikunawankuta ama saqeychu, nillataj mana imallamanta chejnikuwajkuna alqochakuwachunkuchu.

²⁰ Paykuna mana ujkunawan allinpi kawsakuyta mask'ankuchu, manachayqa wasanchanankupaj wakichikunku allin ruwajkunaj contrankupi.

²¹ Contraypi parlanankupaj siminkuta chhikanta kicharispa, ninku: Qhawariychej, imamanchus pay chayasqanta rikuychej, nispa.

²² Tata Dios, qan chay tukuyta rikunki. Chayrayku ama ch'inlla kakuychu ari. Tukuyta Kamachej Dios, amataj noqamanta karunchakuychu.

²³ Tukuyta Kamachej Diosníy, rijch'ariy, noqaman kutikuspa sayariy, justiciatataj ruwaway.

²⁴ Tata Diosníy, cheqan kayniykiman jina juzgaway, awqaykuna ama kusipayanawankupaj.

²⁵ Ama sonqonkupi nichunkuchu, nitaj yuyachunkuchu: Ajinata payta atipasqata rikuyta munarqanchej, nispa.

²⁶ Manachayqa pikunachus llakiypi kasqaymanta kusikojkuna p'enqachisqa, k'umuykuchisqataj rikhurichunku. P'enqaypipuni rikhurichunku, pikunachus noqamanta aswan kasqankuta yuyajkunaqa.

²⁷ Chaywanpis kusikuchunku, kusiymantataj takichunku, pikunachus awqaykunata atipanayta munajkunaqa. Sapa kuti nichunku: Tata Dios jatunchasqa kachun, imajtinchus payqa kamachinpa allin kayninmanta kusikun, nispa.

²⁸ Chantá justiciaykimanta parlasaj, tukuy p'unchaytaj qanta yupaychasqayki.