Salmos 34 - DIOSPA QHELQACHISQ

(1)

SALMO 34 Tata Diosqa paypata kajkunata waqaychan

(1) (Davidpa ruwasqan takiy)

¹ 1 (2) Tukuy tiempo Tata Diosta yupaychasaj, simiytaj payta jatunchallanqapuni.

² 2 (3) Noqaqa Tata Diosta tukuy kayniywan yupaychasaj. Llamp'u sonqoyoj runakuna, chayta uyarispa, kusikuychej.

³ 3 (4) Noqawan khuska, uj kunkallataj, Tata Diospa jatun sutinta yupaychanachej.

⁴ 4 (5) Tata Diosta qhaparikorqani, paytaj uyariwarqa, jinataj tukuy manchachikusqaymanta pay librawarqa.

⁵ 5 (6) Tata Diosman qayllaykojkunaqa manchay kusisqa kanku, imaraykuchus ni jayk'ajpis p'enqachisqachu kanqanku.

⁶ 6 (7) Noqa mana imapaj valej runa kaspapis qhaparikorqani, Tata Diostaj uyariwarqa, tukuy llakiyniymantataj pay orqhowarqa.

⁷ 7 (8) Tata Diospa angelnenqa Diosta jatun respetowan qhawajkunaj muyuyninkupi jaraykukuspa, jark'an.

⁸ 8 (9) Qhawaychej, yachaychejtaj Tata Dios k'acha kasqanta. Kusikuyniyojmin paypi atinikoj runaqa.

⁹ 9 (10) Tata Diosta yupaychaychej, paypa ajllakusqan kajkuna. Tata Diosta jatun respetowan qhawajkunapaj ni imapis pisenqachu.

¹⁰ 10 (11) León uñakunaqa yarqhaymanta waqanku, Tata Diosta mask'ajkunarí ni imamanta pisichikonqankuchu.

¹¹ 11 (12) Jamuychej wawaykuna, uyariwaychej. Tata Diosta jatunpaj qhawayta yachachisqaykichej.

¹² 12 (13) Unaytachu kawsayta munanki? Pitaj kawsaspa allin kajta rikuyta munan?

¹³ 13 (14) Chayta munaspaqa, mana ima mana allintapis parlarparillaychu, simiykipis ama llullata parlachunchu.

¹⁴ 14 (15) Mana allinta ruwanamanta karunchakuy, allin kajtataj ruway. Tukuywan allinpi kawsakuyta mask'ay, chaytataj qhatiy.

¹⁵ 15 (16) Tata Diosqa cheqanta ruwaj runakunata qhawashan, qhaparikusqankutataj uyarin.

¹⁶ 16 (17) Tata Diosqa millayta ruwajkunaj contrankupi sayaykun, kay pachamanta sutinkuta chinkachinanpaj.

¹⁷ 17 (18) Cheqan sonqoyoj runakunaj qhaparikusqankuta Tata Dios uyarin, tukuy llakiyninkumantataj paykunata orqhon.

¹⁸ 18 (19) Tata Diosqa sonqo p'akisqa kajkunata qhespichinanpaj qayllallankupi kashan, pikunachus manaña ima suyanayoj kanku, chaykunata.

¹⁹ 19 (20) Cheqan sonqoyoj runa tukuy imaymana llakiykunata rikun. Tata Diostajrí chaymanta llojsinanpaj yanapan.

²⁰ 20 (21) Tata Dios paykunata waqaychanqa, manataj ni uj tullullankupis p'akisqachu kanqa.

²¹ 21 (22) Millayta ruwaspa purejkunatarí mana allinta ruwasqallankutaj wañuchin. Cheqan runata chejnikojkuna jasut'isqapuni kanqanku.

²² 22 (23) Tata Dios paypa munasqanta ruwajkunata kacharichenqa, pikunachus paypi atinikojkunataj mana jasut'isqachu kanqanku.