Salmos 32 - DIOSPA QHELQACHISQ

1a

SALMO 32 Tata Dios juchata pampachasqanmanta kusikuna

1a (1a) (Davidpa ruwasqan takiy)

¹ (1b) Kusikuyniyojmin runaqa juchan pampachasqa kajtin, tukuy millay ruwasqantaj p'ampasqa kajtin.

² Kusikuyniyojmin, Tata Diospa mana juchachasqan runaqa, pejpa sonqonpichus q'otiyayta yuyana mana kanchu, chay runa.

³ Noqa juchayta manaraj rimarishajtiy, tukuy ukhuy llawch'iyawarqa, tuta p'unchaytaj waqarqani.

⁴ Qan tuta p'unchay jasut'ispa ñak'arichiwarqanki. Q'oñi tiempopi qawisqa t'ika jina kallpay pisiyawarqa.

⁵ Chantá mana imatapis pakaspa, juchayta, millay ruwasqayta ima willakorqayki. Nerqani: Juchayta rimarisaj, nispa. Qantaj, Tata Dios, juchayta pampacharqanki.

⁶ Chayrayku, llakiy paykunata qhatirejtin, qanta qhatisojkuna mañakusonqanku. Mayu wasaykuspapis, mana paykunakama chayanqachu.

⁷ Qanmin pakakunay kanki. Mana allin kajmanta jark'akuwanki, kacharichiwaspataj, kusiy takiykunawan muyuykuwanki.

⁸ Tata Dios nin: Ñaweyqa qan qhawarisqalla kashan. Yuyaychasqayki, yachachisqaykitaj imaynatachus purinaykita.

⁹ Ama caballo jina, chayrí mula jina kaychu. Chaykuna mana yuyayniyojchu kanku, manachayqa chay uywakunata frenowan, reatawantaj sayachina tiyan. Jinallaqa dueñonman mana qayllankuchu.

¹⁰ Millayta ruwaspa purejkunaqa ancha ñak'ariykunata rikonqanku. Chaywanpis Tata Diospi atinikojkunataqa paypa munakuynin muyuykonqa.

¹¹ Cheqan runakuna, Tata Diospi kusikuychej. K'acha runakuna, kusikuychej, kusiymantataj qhapariychej.