Salmos 29 - DIOSPA QHELQACHISQ

1a

SALMO 29 Tata Diospa atiynenqa t'ukunamin

1a (1a) (Davidpa ruwasqan takiy)

¹ (1b) Janaj pachapi tukuy kajkuna, Tata Diosta yupaychaychej. Tata Diospa atiyninta, jatun kayninpa lliphipiynintawan ima jatunchaychej.

² Tata Diospa manchay uyarisqa sutinta jatunchaychej, Tata Diosta paypaj ajllakusqan wasinpi yupaychaychej.

³ Tata Diospa parlasqanqa mama qocha patapi uyarikun. Jatun Atiyniyoj Diospa parlasqanqa illapaj t'ojyasqanta jina uyarikun. Tata Dios mama qocha patapi kashan.

⁴ Tata Diosqa jatunmanta qhaparin, paypa parlasqantaj may jina atiyniyojmin.

⁵ Tata Diospa parlasqanqa cedro sach'akunata chaqon. Tata Diosqa Libanopi cedro sach'akunata k'ajllaran.

⁶ Sirión orqota, Líbano orqotawan Tata Dios parlaspa kharkatichin, k'ita torokunata, torillokunata jinataj phinkiykachachin.

⁷ Tata Diospa parlasqanqa nina lawrarishajta kacharin.

⁸ Tata Diospa parlasqanqa ch'innejta kharkatichin. Tata Diosqa Cades sutiyoj ch'innejta kharkatichin.

⁹ Tata Diospa parlasqanqa encina sach'akunata k'ajllaran, montetataj mana sach'ayojta saqerparin. Yupaychana wasinpitaj payta tukuy jatunchanku.

¹⁰ Tata Diosqa Kuraj Kamachejmin, paytaj wiñaypaj kamachin. Pay parata munasqanta ruwananpaj kamachin.

¹¹ Tata Diosqa ayllunmanpis kallpata qollantaj. Jinallataj Tata Dios sonqo tiyaykusqa kawsakuywan ayllunta saminchan.