Salmos 27 - DIOSPA QHELQACHISQ

1a

SALMO 27 Tata Diosqa waqaychawajniy

1a (1a) (Davidpa ruwasqan takiy)

¹ (1b) Tata Diosqa k'anchawajniy, qhespichiwajniytaj. Pimantataj manchachikusajri? Tata Diosqa kallpachawajniy, tukuy mana allin kajmanta jark'akuwajniy ima. Imajtintaj imatapis manchachikuyman kasqari?

² Millayta ruwaj awqaykunaqa tantakuspa, noqata chinkachinawankupaj wakichikunku. Chaywanpis paykunallataj misk'aspa urmanqanku.

³ May chhika soldadokunapis muyuykuwachunku. Sonqoyrí mana manchachikonqachu. Noqata maqanawankupajpis wakichikuchunku, noqarí Diosllapipuni atinikusaj.

⁴ Kayllata Tata Diosmanta mañakuni, chayllatataj munani: Kawsanay p'unchaykama Tata Diospa wasinpi kayta munani, Templonpi payta yupaychanaypaj, ima munay kaynintataj qhawanaypaj.

⁵ Llakiykuna qhatiriwajtin, Tata Dios waqaychawanqa. Templon ukhupi pakawanqa, tiyakunan ukhupi waqaychawanqa, chhanka patamantaj sayaykuchiwanqa.

⁶ Chaypacha muyuykuwaj awqaypa ñawpaqenpi umayta oqhariyta atisaj. Chantá uywata ñak'aspa Templonman apasaj, Tata Diosman jaywanaypaj. Chaypitaj kusiywan Tata Diosta yupaychaspa takisaj.

⁷ Tata Dios, qanman qhaparikamuyki, uyarillaway. Noqamanta khuyakuspa, kutichiway.

⁸ Sonqoyqa niwan: Tata Diosta mask'ay, nispa, noqataj, Tata Dios, qanta mask'ayki.

⁹ Ama noqamanta pakakuychu. Phiñakuspa, ama qhesachawaychu. Qanlla yanapawajniy kanki. Ama sapayta saqerpariwaychu, amataj wijch'urpariwaychu, imaraykuchus qanmin qhespichiwaj Diosniy kanki.

¹⁰ Tatay, mamay saqerpariwankuman chaypis, qan, Tata Dios, noqata uywakapuwanki.

¹¹ Tata Dios, imaynatachus kawsanayta munasqaykita niway, cheqan ñantataj pusaway, imaraykuchus awqaykunaqa ashkha kanku.

¹² Ama paykunaj makinkuman jaywaykuwaychu, imaraykuchus contraypi llullakuspa parlajkuna sayaykunku. Paykuna maqanawankupaj jina qhawashawanku.

¹³ Chaywanpis noqa kayta sut'ita yachani: Kay pachapi kawsanaykamaqa Tata Diospa k'acha kayninta rikusajpuni.

¹⁴ Tata Dios yanapasunanta pacienciawan suyakuy. Kallpachakuy, amataj llawch'iyaychu. Arí, Tata Diospi atinikuspa, pacienciawan suyay.