Salmos 26 - DIOSPA QHELQACHISQ

1a

SALMO 26 Diosta kasuspa kawsana

1a (1a) (Davidpa ruwasqan takiy)

¹ (1b) Tata Dios, justiciata ruwaway ari, imajtinchus mana k'amina kawsayniyoj kani. Mana iskayrayaspa qanpi atinikuni.

² Sonqoyta allinta qhaway, Tata Dios, yachawaytaj. Imatachus noqa munasqayta yachay, sonqoy ukhupi yuyasqaytapis rejsiy.

³ Noqaqa munakuyniykipi yuyallanipuni, cheqan kayniykiman jinataj kawsani.

⁴ Llullakojkunawan ni jayk'aj kawsakorqanichu, nitaj puraj uyayojkunawanqa tantakorqanichu.

⁵ Millayta ruwaspa purejkunaj tantakuyninkuta chejnikuni, Diosta wasanchajkunawantaj mana kawsakorqanichu.

⁶ Tata Dios, makeyqa tukuy juchamanta llimphuchasqaña. Chayrayku altarniykiman qayllaykuyta munani.

⁷ Yupaychasuspa takiyta munani, t'ukunata ruwasqaykimanta willanaypaj.

⁸ Tata Dios, tiyakunayki Temploykita noqa munakuni, maypichus jatun kayniykej lliphipiynin kashan, chayta.

⁹ Juchasapakunatawan khuskata ama wañuchiwaychu, nitaj runa wañuchejkunatawan khuskatapis tukuchiwaychu.

¹⁰ Paykunaj makinkoqa millayta ruwanawan, lluk'ita jap'isqankuwan ima junt'a kashan.

¹¹ Kawsayniyrí ni pej ima ninan. Chayrayku qhespichiway, noqamantataj khuyakuway.

¹² Noqaqa pampapi sinch'ita sayashani, jatun tantakuypitaj Tata Diosta yupaychasaj.