Salmos 25 - DIOSPA QHELQACHISQ

1a

SALMO 25 Tata Dios juchata pampachananta mañakuna

1a (1a) (Davidpa ruwasqan takiy)

¹ (1b) Tata Dios, tukuy sonqo qanwan parlarikuspa mañakuyki.

² Qanmin Diosniy kanki, qanpi atinikuni. Ama p'enqachisqa kanayta munaychu, nitaj noqamanta awqaykuna asikunawankuta saqeychu.

³ Qanpi suyakojqa mana ujpis p'enqachisqachu kanqa. Aswanpis contraykipi qhasimanta oqharikojkunamá p'enqaypi rikhurichunku.

⁴ Munasqaykiman jina kawsayta yachachiway, Tata Dios, cheqan ñanniykitataj pusaway.

⁵ Cheqan kayniykinejta pusaway, yachachiwaytaj. Qanmin Diosniy kanki, qhespichiwajniytaj, noqataj tukuy p'unchay qanpi atinikuni.

⁶ Tata Diosníy, k'acha kayniykita, khuyakuyniykita ima sapa p'unchay rikuchiwasqaykita yuyarikuy.

⁷ Wayna kashaspa juchallikusqaymanta ama yuyarikuychu, nitaj contraykipi oqharikusqaymantapis. Tata Dios, jatun munakuyniykiman jina, k'acha kayniykiman jinataj noqamanta yuyarikuy.

⁸ Tata Diosqa k'acha sonqo, cheqanpunitaj. Chayrayku juchasapakunata cheqan ñanman churan.

⁹ Llamp'u sonqoyojkunata cheqan ñannejta pusan, imaynatachus purinankutataj yachachin.

¹⁰ Pikunachus Tata Diospa trato ruwasqanta, chantá kamachisqanta kasunku, chaykunata Tata Dios khuyakuyninwan chantá nisqanta junt'aj kasqanwan ima pusan.

¹¹ Tata Dios, millayta ruwasqayqa may jinamin. Chaywanpis sutiyki jatunchasqa kananrayku juchayta pampachay.

¹² Pichus Tata Diosta jatunchan, chay runamanqa Tata Dios imaynatachus purinanta yachachenqa.

¹³ Chay runataqa imapipis allin renqa, wawankunataj jallp'ata chayaqenkupaj jap'enqanku.

¹⁴ Tata Dios kawsakun, pikunachus payta may jatun respetowan qhawanku, chaykunawan, tratontapis paykunaman rejsichenqa.

¹⁵ Noqaj ñaweyqa Tata Diosllapipuni kashan, imaraykuchus pay tojllamanta orqhowanqa.

¹⁶ Qhawariway, Tata Dios, khuyarikuwaytaj, imaraykuchus sapallay, phutisqataj kashani.

¹⁷ Sonqoytaqa llakiykuna astawan astawan ñit'iykushawan, kay phutiykunamantataj orqhoway.

¹⁸ Llakiyniyoj, phutikuyniyoj kashasqayta qhawariway, tukuy juchaytataj pampachay.

¹⁹ Qhaway, awqaykuna astawan yapakushanku, paykunataj chejnikuwaspa, mana rikuytapis atiwankuchu.

²⁰ Waqaychaway, qhespichiwaytaj. Ama p'enqachisqa rikhurinayta saqewaychu, imaraykuchus qanpi atinikuni.

²¹ Cheqan ruwasqay, mana juchayoj kasqay ima waqaychawachunku, imaraykuchus qan yanapanawaykita suyakuni.

²² Diosníy, tukuy llakiykunamanta Israel aylluykita kacharichiy.