Salmos 22 - DIOSPA QHELQACHISQ

(1)

SALMO 22 Llakiypi qhaparikuy, kusiymantataj takiy

(1) (Davidpa ruwasqan takiy)

¹ 1 (2) Diosníy, Diosníy, imaraykutaj saqerpariwankiri? Imaraykutaj yanapawaj mana jamunkichuri? Waqaspa mañakusqayta imaraykutaj mana uyariwankichuri?

² 2 (3) Diosníy, tuta p'unchay wajyakuyki, qantaj mana uyariwankichu. Noqapajtaj mana samarikuy kanchu.

³ 3 (4) Qantajrí may llimphu kaj Dios kaspa, kamachinki, tukuy israelitakunaj yupaychasqan kanki.

⁴ 4 (5) Tataykukunaqa qanpi atinikusorqanku, qanpi atinikojtinkutaj, paykunata kacharicherqanki.

⁵ 5 (6) Yanapanaykita mañakorqanku, qantaj paykunata qhespicherqanki. Qanpi atinikusorqanku, qantaj paykunata mana p'enqaypi rikhuricherqankichu.

⁶ 6 (7) Noqatajrí mana runachu kani, manachayqa khurulla. Runaj asikunan kani, millachikunantaj.

⁷ 7 (8) Rikuwajkunaqa noqamanta alqochakuwanku, siminkuta llint'aykachaspataj, umankuta khiwinku.

⁸ 8 (9) Niwankutaj: Payqa Tata Diospi atinikuspa suyakorqa. Jina chayqa, Tata Dios kacharichichun ari. Sichus Tata Dios chhikatapuni payta munakun chayqa, pay kikin jamuspa, kacharichichun ari, nispa.

⁹ 9 (10) Jinataj ari, qanqa mamaypa wijsanmanta paqarichiwarqanki. Mamaymanta ñuñushajtillayraj, qanpi atinikuyta yachachiwarqanki.

¹⁰ 10 (11) Manaraj paqarishajtiy, noqaqa ojllayniykipi karqani, mamaypa wijsanmantapacha qanqa Diosniy kanki.

¹¹ 11 (12) Ama noqamanta karunchakuychu, imaraykuchus llakiywan muyuykusqa kashani, nitaj pipis yanapawaj kanchu.

¹² 12 (13) Awqaykuna ashkha torokuna jina muyuykuwanku, Basanmanta phiña torokuna jina kallparara kanku.

¹³ 13 (14) Phiña leonkuna jina qhaparinku. Siminkuta kicharispa, oqoykunawankupaj jina phinkiykamuwanku.

¹⁴ 14 (15) Jich'asqa yaku jina kani, tukuy tulluytaj ch'utasqa kashan. Sonqoypis mapha jina ukhuypi unuyashan.

¹⁵ 15 (16) Simeyqa ch'aki kashan, qalluytaj mallq'ayman k'askaykun. Qantaj jallp'aj sonqonkama chinkaykuchiwanki.

¹⁶ 16 (17) Alqokuna jina uj t'ojpa millayta ruwajkuna muyuykuwanku. Paykuna chakiyta, makiytawan jusk'urawanku.

¹⁷ 17 (18) Tulluykunata yupakuyta atini, paykunataj qhawawaspallapuni kanku.

¹⁸ 18 (19) P'achay patapi suerteta choqaspa, paykunapura p'achayta rak'inakunku.

¹⁹ 19 (20) Chaywanpis qan, Tata Diosníy, kallpay kanki. Ama noqamanta karunchakuychu, manachayqa usqhayta yanapawaj jamuy.

²⁰ 20 (21) Espadawan wañuchisqa kanaymanta libraway, amataj saqeychu chay alqokuna wañuchinawankuta.

²¹ 21 (22) Leonkunaj siminkumanta kacharichiway, k'ita torokuna wajranawankumantataj waqaychaway.

²² 22 (23) Chantá noqa wawqeykunaman qanmanta parlasaj, jatun tantakuypitaj yupaychasqayki.

²³ 23 (24) Qankuna, Tata Diosta maypaj qhawajkuna, payta jatunchaychej. Jacobpa mirayninmanta kajkuna, payta yupaychaychej. Israelmanta tukuy mirajkuna, payta yupaychaychej,

²⁴ 24 (25) imaraykuchus payqa wajchakunaj ñak'ariyninkuta mana pisipaj qhawanchu, nitaj paykunata qhesachanchu. Mana paykunamanta pakakunchu, manachayqa payman qhaparikojtinku, uyarinpuni.

²⁵ 25 (26) Noqaqa aylluykej jatun tantakuyninpi qanta yupaychasqayki, qanta jatun respetowan qhawasojkunaj ñawpaqenpitaj nisqayta junt'asajpuni.

²⁶ 26 (27) Wajcha runakuna sajsakunankukama mikhonqanku. Tata Diosta mask'ajkuna payta yupaychanqanku, unaytataj kawsanqanku.

²⁷ 27 (28) Tukuy kay pachamanta runakunapis Tata Diosmanta yuyarikuspa, payman kutirikullanqankutaj, ñawpaqenpitaj tukuy runakuna qonqorikonqanku,

²⁸ 28 (29) imaraykuchus Tata Diosqa kuraj kamachejmin, paytaj tukuy suyukunata kamachin.

²⁹ 29 (30) Kay pachapi tukuy atiyniyojkuna payta yupaychanqanku. Tukuy wañojkunapis paypa ñawpaqenpi k'umuykullanqankutaj, imaraykuchus paykuna jallp'aman tukoj runalla kanku.

³⁰ 30 (31) Qhepanejman mirajkunapis Tata Diospa kamachiyninpi kanqanku, paykunataj qhepa mirajkunaman Tukuyta Kamachej Diosmanta parlanqanku.

³¹ 31 (31) Qhepanejman paqarejkunamanpis Diospa cheqan justicianmanta willanqanku, imatachus ruwasqanmantawan ima.