Salmos 19 - DIOSPA QHELQACHISQ

1

SALMO 19 Diospa ruwasqanqa jatun kayninmanta sut'inchan

1 (1) (Davidpa ruwasqan takiy)

¹ 1 (2) Janajqa Diospa may jatun kayninmanta parlawanchej, chaypi tukuy ima kajtaj makinwan ruwasqanmanta sut'inchawanchej.

² 2 (3) Uj p'unchayqa q'ayantin p'unchayman willan, uj tutataj q'ayantin tutaman willallantaj.

³ 3 (4) Mana ima parlaypis, nitaj ima nisqapis, nillataj uj simillapis uyarikunchu.

⁴ 4 (5) Chaywanpis willasqanqa tukuy kay pachapi yachakun, kay pachaj k'uchunkamataj chayan. Chaypi Dios intej wasinta churarqa.

⁵ 5 (6)Inteqa imaynatachus kunallanraj casarakoj qhari wasinmanta llojsimun, ajinata llojsimun, llallinakupi t'ijoj jinataj kusirikuspa, ñanninta purin.

⁶ 6 (7) Inteqa janajpa ujnin kantunmanta llojsimuspa, ujnin kantunman chayanankama muyuykun. Manataj imapis k'ajayninmanta pakakuyta atinchu.

⁷ Tata Diospa yachachisqanqa mana pantayniyoj kaspa, runaj sonqonta kawsarichin. Tata Diospa kamachisqanqa cheqanpuni, jinataj mana yachayniyojta yachayniyojman tukuchin.

⁸ 8 (8) Tata Diospa kamachisqanqa cheqanpuni kaspa, sonqota kusichin. Tata Diospa kamachisqanqa ch'uwa kasqanrayku, runata yachayniyojta ruwan.

⁹ 9 (10) Tata Diosta manchay jatun respetowan qhawanaqa mana ch'ichiyoj, wiñaypajtaj sayan. Paypa kamachisqanqa cheqan, manataj piman kutikunchu.

¹⁰ 10 (11) Chayqa sumaj qorimantapis aswan munana, abeja misk'imantapis aswan misk'iraj.

¹¹ 11 (12) Chaykunanejta, Tata Dios, qan noqata k'amiwanki. Chantá pichus kamachisqaykita junt'ajtaqa may jinata t'inkachinki.

¹² 12 (13) Pitaj pantasqanmanta reparakuyta atinmanri? Qhespichiway Tata Dios, mana reparakuspalla juchallisqaymanta.

¹³ 13 (14) Jinallataj wapuykachanamanta waqaychaway, amataj saqeychu wapuykachay atipanawanta. Ajinamanta ni pej juchachanan kasaj, jatunta juchallinamanta kacharichisqa.

¹⁴ 14 (15) Qanmin, Tata Dios, pakakunay chhanka kanki, kacharichiwaj Diosniytaj. Chayrayku ñawpaqeykipi parlasqay, yuyasqaypis allin kachun.