Salmos 17 - DIOSPA QHELQACHISQ

1a

SALMO 17 Diosmanta mañakuna justicia ruwananta

1a (1a) (Davidqa Diosmanta mañakun)

¹ (1b) Tata Dios, justicia ruwanawaykita mañakususqayta uyariway, qhaparikusqaytapis. Mañakusqayta uyariway, imaraykuchus mana llullakuspa mañakushayki.

² Qanlla justiciata ruwaway, imaraykuchus qanmin justicia imachus kasqanta yachanki.

³ Sonqoypi imachus kasqanta qan watuwanki. Tutan qhawawaj jamuwarqanki sonqoy imaynachus kasqanta yachayta munaspa, manataj ima mana allin kajtapis tarerqankichu. Sonqoypi nerqani simiywan mana pantanayta.

⁴ Noqaqa wajkuna imatachus ruwasqankuta mana ruwanichu, aswanpis kamachisqaykita cuentaman churaspa, kallpaman atinikuspa ruwanamanta karunchakorqani.

⁵ Munasqaykita ruwaspa purinapi sinch'ita sayani, chakiy ama llusk'ananpaj.

⁶ Qanman qhaparikuyki, Diosníy, imaraykuchus qan uyariwankipuni. Uyariway, mañakusqayta uyarillaway ari.

⁷ Qanqa awqankumanta kacharichinki, pikunachus atiyniykipi pakakunku, chaykunata. Chayrayku munakuyniyki imaynapunichus kasqanta rikuchiway.

⁸ Ñawi papaykita jina waqaychaway. Lijraykej uranpi ojllaykuspa pakaykuway.

⁹ Millayta ruwajkuna maqaj sayaykunawankumanta waqaychaway, jinallataj ñak'arichejkuna wañuchiwayta munaspa muyuykuwajkunamantapis.

¹⁰ Paykuna wapuykachaspa jatunchakunku, machu machullataj parlaykachanku.

¹¹ Mayllapipis qhepallaypipuni purinku. Ima pachallapis pampaman urmachinawankupaj suyanku.

¹² Paykuna yarqhasqa leonkuna jina kanku. Jusk'unkupi pakakuspa, ujllata phinkiykunankupaj jina suyashanku.

¹³ Tata Dios, sayariy, paykunawan maqanakoj sayaykuy, paykunatataj k'umuykuchiy. Espadaykiwan millay ruwajkunamanta kacharichiway.

¹⁴ Tata Dios, jatun atiyniykiwan paykunamanta kacharichiway. Kay pachamanta wijch'uy, pikunachus kay pachapi tukuy imayoj kanallapi yuyanku, chaykunata. Qanqa paykunata tukuy imawan junt'acherqanki. Wawankoqa sajsanankukama mikhuchunku, allchhinkupajpis puchuchunraj.

¹⁵ Noqatajrí cheqanta ruwaj kaspa, uyaykita rikusaj. Rijch'arispa, qanta rikusqayki, chaywantaj sonqo junt'asqa kasaj.