Salmos 16 - DIOSPA QHELQACHISQ

1a

SALMO 16 Tata Dios noqawanpuni kashan

1a (1a) (Davidpa ruwasqan takiy)

¹ (1b) Waqaychaway Diosníy, imaraykuchus qanpi atinikuni.

² Nerqayki: Qanmin Tata Dios, Kuraj Kamachejniy kanki. Tukuy allin kajta jap'isqayqa qanmantamin jamun, nispa.

³ Kay pachapi Diospaj t'aqasqa kajkuna, cheqanta purejkuna ima sonqoyta junt'asqata ruwawanku.

⁴ Pikunachus waj diospa qhepanta purejkunapajrí, ñak'ariykuna astawan yapakonqa. Chaywanpis noqaqa ni jayk'aj chay lantikunaman uywa ñak'asqa jaywanata jaywasajchu, nitaj lantikunaj sutinkutapis oqharisajchu.

⁵ Tata Dios, qanmin tukuy imay kanki. Kawsayneyqa makiykipi kashan, qantaj saminchayniykiwan atipachiwanki.

⁶ Manchay sumaj jallp'a suertepi chayawan, qowasqayki chayaqetaj ima munaymin kashan.

⁷ Tata Diosta yupaychasaj, imajtinchus paymin sumajta yuyaychawan. Sonqoy ukhupi ch'isin pay pantasqaymanta reparachiwan.

⁸ Noqaqa Tata Diospipuni yuyani, pay noqawan kajtintaj, mana imapis urmachiwanqachu.

⁹ Chayrayku sonqoy ukhupi may jatun kusiy tiyan, imaraykuchus tukuy sonqo qanpi atinikuspa kawsani.

¹⁰ Qanqa jallp'aj sonqonpi mana saqerpariwankichu, nitaj pichus kasusojpa ukhun asnapunantapis.

¹¹ Aswanpis wiñay kawsayman pusaj ñanta rikuchiwanki. Ñawpaqeykipi may jatun kusikuy tiyan, qanwan khuskataj wiñaypaj sonqo qhallallarishaj kasaj.