Salmos 149 - DIOSPA QHELQACHISQ

SALMO 149 Kuraj Kamachejninchej Tata Diosta yupaychana

¹ Tata Dios jatunchasqa kachun. Mosoj takiyta Tata Diosman takiychej. Diosta qhatejkuna, tantakuspa, payta jatunchaychej.

² Israel aylloqa ruwajninmanta kusikuchun, Sión llajtataj kuraj kamachejninmanta kusikuchun.

³ Tususpa, sutinta jatunchanachej. Arpawan, panderetawan ima Tata Diosman takinachej.

⁴ Tata Diosqa ayllunwan sonqo junt'asqa kashan, llamp'u sonqoyojkunatataj atipachispa pilluykuchin.

⁵ Tata Diosta kasojkunaqa atipasqankumanta kusikuchunku, puñushaspis kusisqa takillachunkupuni.

⁶ Kunkankoj atisqanta takispa, Tata Diosta yupaychachunku. Makinkupitaj filochasqa espadata jap'ichunku,

⁷ Diosta mana qhatejkunawan pagachikunankupaj, tukuy suyumanta runakunatataj jasut'inankupaj.

⁸ Jinallataj chay suyukunaj kuraj kamachejninkuta cadenawan watanqanku, atiyniyoj runankukunatapis fierromanta cadenawan.

⁹ Ajinata ruwanqanku, Tata Dios paykunata juchachasqan junt'asqa kananpaj. Chaymin Diosta qhatejkunapaj kusikunanku kanqa. Tata Dios jatunchasqa kachun.