Salmos 148 - DIOSPA QHELQACHISQ

SALMO 148 Tata Diospa tukuy ruwasqan payta yupaychan

¹ Tata Dios jatunchasqa kachun. Janaj pachapi Tata Diosta jatunchaychej, Janajmantapacha Tata Diosta jatunchaychej.

² Qankuna tukuy angelninkuna, payta yupaychaychej. Janaj pachapi tukuy soldadokuna, payta jatunchaychej.

³ Intipis, killapis, Tata Diosta yupaychaychej, lliphirirej ch'askakunapis payta jatunchallaychejtaj.

⁴ Janaj pacha, payta jatunchay, janajmanta jawapi kaj yakupis yupaychallaychejtaj.

⁵ Tata Diospa sutinta jatunchaychej, imaraykuchus pay kamachejtin, tukuy ima ruwasqa karqa.

⁶ Payqa tukuy imata maychus kananman churarqa wiñay wiñaynintinpaj. Kamachisqanqa mana waj jinaman tukuchisqa kanmanchu.

⁷ Tata Diosta kay pachamantapacha jatunchaychej. Mama qochapi tukuy manchay jatuchaj animalkunapis payta yupaychallaychejtaj.

⁸ Illapa, chijchi para, rit'i, phuyupis, kamachisqanta junt'aj sinch'i wayrapis,

⁹ moqokuna, orqokuna, poqoj sach'akuna, cedrokunapis Tata Diosta yupaychallaychejtaj.

¹⁰ Jinallataj tukuy uywakuna, k'ita animalkuna, qhatatakoj animalkuna, tukuy p'isqokuna ima, tukuypuni Tata Diosta yupaychallaychejtaj.

¹¹ Kay pachapi kuraj kamachejkuna, tukuy runa, kamachejkuna, kurajkuna ima, Tata Diosta yupaychaychej.

¹² Jinallataj qharikuna, warmikuna, waynakuna, sipaskuna, machu runakuna ima Diosta yupaychallaychejtaj.

¹³ Tata Diospa sutinta tukuy jatunchachunku, imajtinchus paypa sutillan manchay jatun respetowan qhawasqa kashan. Paypa jatun kayninpa lliphipiynenqa kay pachamanta, jinallataj janajmantapis aswan patapi kashan.

¹⁴ Payta qhatejkuna Diosta yupaychachunku. Israel ayllun Tata Diosta yupaychachun, imaraykuchus Diosqa ayllunman atiyniyoj kayta qorqa. Tata Dios jatunchasqa kachun.