Salmos 146 - DIOSPA QHELQACHISQ

SALMO 146 Tata Diosqa paypi atinikojkunata yanapan

¹ Tata Dios jatunchasqa kachun. Tukuy sonqoywan Tata Diosta jatunchasaj.

² Tata Diosta kawsanaykama jatunchasaj. Kay pachapi kawsanaykamaqa Diosniyman takisaj.

³ Atiyniyojkunapi ama atinikuychejchu, imaraykuchus paykuna runalla kaspa, mana yanapayta atisonqachejchu.

⁴ Paykuna wañupuspaqa, jallp'aman tukupunku, chay p'unchaypachataj yuyaychakusqankupis chinkapun.

⁵ Kusikuyniyoj kanku, pikunatachus Jacobpa Diosnin yanapan, chaykuna, pikunachus Tata Dioslla yanapananta suyakojkuna.

⁶ Payqa janajta, kay pachatapis ruwarqa, mama qochata, tukuy chaypi kajkunatawan. Paytaj nisqanta mana qonqaspa junt'anpuni.

⁷ Tata Diosqa ñak'arichisqa kajkunapaj justiciata ruwan, yarqhachikojkunaman mikhuchin, wisq'asqa kajkunatapis kacharichillantaj.

⁸ Tata Diosqa mana rikojkunata qhawarichin, urmajkunatapis aysarin. Tata Diosqa cheqanta ruwaspa purejkunata munakun.

⁹ Tata Diosqa waj llajtayojkunata waqaychan. Payqa warmisapakunata, wajcha wawakunatapis qhawarin. Millayta ruwaspa purejkunaj yuyasqankutatajrí pantachin.

¹⁰ Tata Dios wiñaypaj kamachenqa. Sión llajta, Diosniykeqa wiñay wiñaypaj kamachenqa. Tata Dios jatunchasqa kachun.