Salmos 141 - DIOSPA QHELQACHISQ

1a

SALMO 141 Tata Dios waqaychaway

1a (1a) (Davidpa ruwasqan takiy)

¹ (1b) Tata Dios, qanman mañakuspa qhaparikamuyki. Usqhayllata jamuy, uyariway ari wajyakusojtiy.

² Mañakususqayqa inciensoj q'apaynin jina qanman chayamusuchun. Makiyta oqharispa mañakusqaytaj inti yaykuyta q'olachisqa jaywana jina kachun.

³ Tata Dios, simiyman ñukuta churaway, simiy mana allinta parlananmantataj waqaychaway.

⁴ Ama munaychu ari sonqoy millay ruwanaman aysachikunanta. Amallataj munaychu mana allin kajta ruwaysikunayta, nillataj munaychu millayta ruwajkunaj jatun mikhuyninkupi mikhuysikunayta.

⁵ Cheqanta ruwaj runa jasut'iwaspaqa, allinta ruwawan, k'amiwasqantaj noqapaj sumajta q'apaj jawina jina kanqa. Tata Diosníy, mañakuyki, mana allin ruwajkunata jasut'inaykita.

⁶ Maypachachus mana allin ruwajkunaj kamachejninkukuna qaqaman tanqaykusqa kanqanku chaypacha, parlasqay cheqan kasqanta yachanqanku.

⁷ Chantá runakuna nenqanku: Imaynatachus llank'aspa jallp'ata qhallinchej, ajinallatataj tullunku aya p'ampana kantupi qhallisqa kanqanku, nispa.

⁸ Chayrayku Tukuyta Kamachej Tata Dios, ñaweyqa qan qhawarisqalla kashan. Qanllapi atinikuni, chayrayku ama saqerpariwaychu ari.

⁹ Urmanaypaj tojllata churawasqankumanta jark'away, millayta ruwajkunaj ch'ipanmantataj kacharichiway.

¹⁰ Millayta ruwajkuna kikin tojlla churasqallankupitaj urmachunku. Noqatajrí mana imanasqa chaymanta llojsisaj.