Salmos 136 - DIOSPA QHELQACHISQ

SALMO 136 Tata Diospa munakuynenqa wiñaypajmin

¹ Tata Diosta pachis niychej, k'acha kasqanrayku, imaraykuchus munakuynenqa wiñay wiñaypajmin.

² Dioskunaj Diosninman pachis niychej, imaraykuchus munakuynenqa wiñay wiñaypajmin.

³ Tukuy kamachejkunata kamachej Diosta pachis niychej, imaraykuchus munakuynenqa wiñay wiñaypajmin.

⁴ Uj k'ata t'ukuna imakunata ruwajman pachis niychej, imaraykuchus munakuynenqa wiñay wiñaypajmin.

⁵ Sumaj yachaywan janajkunata ruwajman pachis niychej, imaraykuchus munakuynenqa wiñay wiñaypajmin.

⁶ Yaku patapi jallp'ata qhatanata jina aysajman pachis niychej, imaraykuchus munakuynenqa wiñay wiñaypajmin.

⁷ Intita, killatapis ruwajman pachis niychej imaraykuchus munakuynenqa wiñay wiñaypajmin.

⁸ Payqa intita p'unchaypi k'anchananpaj ruwarqa, imaraykuchus munakuynenqa wiñay wiñaypajmin.

⁹ Jinallataj killata, ch'askakunatawan tuta k'anchanankupaj ruwarqa, imaraykuchus munakuynenqa wiñay wiñaypajmin.

¹⁰ Tukuy Egipto llajtayojkunaj kuraj kaj churinkukunata wañuchejta pachis niychej, imaraykuchus munakuynenqa wiñay wiñaypajmin.

¹¹ Jinallataj Egiptomanta israelitakunata orqhojman pachis niychej, imaraykuchus munakuynenqa wiñay wiñaypajmin.

¹² Payqa Egiptopi atiyniyoj kasqanta rikucherqa, imaraykuchus munakuynenqa wiñay wiñaypajmin.

¹³ Puka Mama Qochata iskayman khallajta pachis nillaychejtaj, imaraykuchus munakuynenqa wiñay wiñaypajmin.

¹⁴ Puka Mama Qochaj chawpinta israelitakunata chimpachejman pachis niychej, imaraykuchus munakuynenqa wiñay wiñaypajmin.

¹⁵ Faraonta, soldadonkunata ima Puka Mama Qochaman p'ultiykojman pachis niychej, imaraykuchus munakuynenqa wiñay wiñaypajmin.

¹⁶ Ch'innejta ayllunta pusajman pachis nillaychejtaj, imaraykuchus munakuynenqa wiñay wiñaypajmin.

¹⁷ Manchay uyarisqa kuraj kamachejkunata atipajman pachis niychej, imaraykuchus munakuynenqa wiñaypajmin.

¹⁸ Atiyniyoj kuraj kamachejkunata wañuchejman pachis niychej, imaraykuchus munakuynenqa wiñay wiñaypajmin.

¹⁹ Amorreokunaj kuraj kamachejninku Sijonta wañuchejman pachis nillaychejtaj, imaraykuchus munakuynenqa wiñay wiñaypajmin.

²⁰ Basán suyoj kuraj kamachej Ogta wañuchejman pachis nillaychejtaj, imaraykuchus munakuynenqa wiñay wiñaypajmin.

²¹ Chay kuraj kamachejkunaj jallp'ankuta israelitakunaman rak'irajman pachis niychej, imaraykuchus munakuynenqa wiñay wiñaypajmin.

²² Israelitakunaman chayaqeta jina chay jallp'ankuta qojman pachis nillaychejtaj, imaraykuchus munakuynenqa wiñay wiñaypajmin.

²³ K'umuykuchisqa kashajtinchej noqanchejmanta yuyarikojman pachis niychej, imaraykuchus munakuynenqa wiñay wiñaypajmin.

²⁴ Awqanchejkunamanta noqanchejta kacharichejman pachis nillaychejtaj, imaraykuchus munakuynenqa wiñay wiñaypajmin.

²⁵ Jinallataj, runakunaman, uywakunamanpis mikhunata qojman pachis niychej, imaraykuchus munakuynenqa wiñay wiñaypajmin.

²⁶ Janaj pachapi kaj Diosman pachis niychej, imaraykuchus munakuynenqa wiñay wiñaypajmin.