Salmos 132 - DIOSPA QHELQACHISQ

1a

SALMO 132 Tata Dios Davidman nisqanmanta

1a (1a) (Karu llajtamanta Jerusalenman jamunapaj takiy)

¹ (1b) Tata Dios, Davidmanta yuyarikuy, chay jinata ñak'arisqanmantawan.

² Jacobpa Tukuy Atiyniyoj Tata Diosnin, Davidpa nisqanmanta yuyarikuy, tiluspa nisusqanmanta:

³ Mana wasiyman yaykusajchu, nitaj puñojpis siriykusajchu.

⁴ Mana ñawiyta wisq'asajchu, nitaj puñuyta ch'utasajchu,

⁵ Tata Diospaj uj cheqata tarinaykama, Jacobpa Tukuy Atiyniyoj Diosnin chaypi tiyakunanpaj, nispa.

⁶ Efrata cheqapi arcamanta parlajta uyarerqayku, Jaar cheqapitaj chay arcata tarerqayku:

⁷ Jaku rina, maypichus Tata Dios tiyakun, chayman, ñawpaqenpitaj qonqorikunachej.

⁸ Tata Dios, maypichus samarikunaykiman jamuy, arcaykiwan khuska atiyniyoj kasqaykita rikuchej.

⁹ Sacerdoteykikunaqa llimphu kawsaywan p'achawan jina p'achallisqa kachunku, kamachiyniykipi kajkunapis kusiymanta takichunku.

¹⁰ Kamachiyki Davidta munakusqaykirayku, ajllakusqayki kuraj kamachejta ama qhesachaychu.

¹¹ Tata Diosqa Davidman tiluspa, ujta nerqa, tilusqantataj mana p'akenqachu. Pay nerqa: Mirayniykimanta ujninta kamachinayki tiyanapi tiyachisaj.

¹² Sichus churiykikuna tratoyta junt'anqanku, kamachisqaytapis kasonqanku chayqa, paykunaj wawankupis kamachinayki tiyanapi wiñaypaj tiyanqanku, nispa.

¹³ Tata Dios Sión orqota ajllakorqa chaypi tiyakunanpaj.

¹⁴ Pay nerqa: Kaypi wiñaypaj tiyakusaj, kaypimin kamachinay tiyanata churayta munani.

¹⁵ Aylluypa mikhunanta mayta ashkhayachisaj, wajcha runakuna mikhunawan sajsakunankupaj.

¹⁶ Sacerdotenkunata llimphu kawsaywan p'achawan jina p'achallichisaj. Diosta mana wasanchaj kamachikunapis kusiymanta takirikonqanku.

¹⁷ Kaypi Davidpa atiyninta watej jatarichisaj. Ajllakusqay kuraj kamachejtaj aylluypaj k'anchay jina kanqa.

¹⁸ Awqankunata p'enqaypi rikhurichisaj, Davidpa umanpi pillunrí lliphipirenqa, nispa. Ajinata Tata Dios nerqa.