Salmos 118 - DIOSPA QHELQACHISQ

SALMO 118 Qhespichiwasqanchejmanta pachis nina

¹ Tata Diosta pachis niychej, k'acha kasqanrayku, imajtinchus khuyakuynenqa wiñay wiñaypajmin.

² Israelitakuna nichunku: Tata Diospa khuyakuynenqa wiñay wiñaypajmin, nispa.

³ Aaronpa ayllunmanta sacerdotekunapis nichunku: Tata Diospa khuyakuynenqa wiñay wiñaypajmin, nispa.

⁴ Tata Diosta manchay jatun respetowan qhawajkunapis nillachunkutaj: Tata Diospa khuyakuynenqa wiñay wiñaypajmin, nispa.

⁵ Noqa sinch'i llakiyniyoj kashaspa, Tata Diosmanta mañakorqani, paytaj uyariwaspa, llakiyniymanta orqhowarqa.

⁶ Tata Dios noqawan kashan, manataj manchachikusajchu. Imanawanqataj runari?

⁷ Tata Dios noqawan kashan. Paymin yanapawan, noqataj chejnikuwajkunata atipasqata rikusaj.

⁸ Aswan sumajmin Tata Diospi atinikuna runallapi atinikunamanta nisqaqa.

⁹ Aswan sumajmin Tata Diospi atinikuna, manchay uyarisqa runakunapi atinikunamanta nisqaqa.

¹⁰ Tukuy suyumanta runakuna muyuykuwarqanku. Noqatajrí Tata Dios yanapawasqanrayku paykunata atiparqani.

¹¹ Tukuynejmanta muyuykuwarqanku. Noqatajrí Tata Dios yanapawasqanrayku paykunata atiparqani.

¹² Lachiwana jina muyuykuwarqanku, khishkata ruphashaj nina jina contraypi manchayta phiñarikuspa oqharikorqanku. Noqatajrí Tata Dios yanapawasqanrayku paykunata atiparqani.

¹³ Urmachinawankupaj nishuta tanqarpariwarqanku, Tata Diostajrí yanapawaj jamorqa.

¹⁴ Chayrayku kallpachawaj Tata Diosman noqa takini. Paymin qhespichiwajneyqa.

¹⁵ Cheqanta ruwajkunaj wasinkupi atipasqankurayku kusiymanta takisqanku uyarikun: Tata Dios jatun atiyninwan t'ukuna imakunata ruwan, nispa.

¹⁶ Tata Diospa atiynenqa may jina jatunmin, atiyninwantaj t'ukunata atipan.

¹⁷ Manaraj wañuyta munanichu, aswanpis kawsaytaraj, Tata Diospa ruwasqanmanta runa masiyman parlanaypaj.

¹⁸ Tata Dios sinch'ita jasut'iwarqa. Jinapis mana wañojta saqewarqachu.

¹⁹ Cheqanta ruwajkunaj yaykunanku punkuta kichariwaychej, chayninta yaykuspa, Tata Diosman pachis ninaypaj.

²⁰ Kaymin Tata Diospa punkonqa, chayninta Tata Diosta kasukojkunalla yaykonqanku.

²¹ Pachis niyki, Tata Dios, uyariwasqaykimanta, qhespichiwasqaykimanta ima.

²² Wasi ruwajkunaj pisipaj qhawasqanku rumeqa cimiento esquinapaj sumaj rumiman tukupun.

²³ Chayqa Tata Diospa ruwasqanmin, noqanchejtaj t'ukuspa qhawanchej.

²⁴ Kay p'unchayqa Tata Diospa wakichisqan p'unchay kasqanrayku, sonqo t'ikarishaj paywan kusikunachej.

²⁵ Tata Dios, ama jina kaspa qhespichiwayku ari. Tata Dios, allin rinawaykuta mañarikuyku.

²⁶ Tata Diospa sutinpi jamojta jatunchaychej. Noqayku Tata Diospa Templonmantapacha qankunata saminchayku.

²⁷ Tata Diosqa Diospuni, paymin k'anchawajninchejqa. Raymi ruwayta qallariychej, sach'aj thansanta k'utuspataj, altarpa wajran chayman apaychej.

²⁸ Qanmin Diosniy kanki, noqataj pachis niyki. Qanmin Diosniy kanki, noqataj sutiykita jatunchasaj.

²⁹ Tata Diosta pachis niychej, k'acha kasqanrayku, imajtinchus khuyakuynenqa wiñay wiñaypajmin.