Salmos 105 - DIOSPA QHELQACHISQ

SALMO 105 Tata Dios israelitakunata yanapan

¹ Tata Diosta pachis niychej, sutintataj jatunchaychej. Tukuy runaman ruwasqanmanta willaraychej.

² Payta yupaychaspa takiychej, tukuy t'ukuna ruwasqanmantataj parlaychej.

³ Tata Diospa may llimphu sutinrayku kusikuychej. Tata Diosta mask'ajkunaj sonqonku kusikuchunku.

⁴ Tata Diosta mask'aychej, atiyninpitaj atinikuychej. Payta sapa p'unchay mask'allaychejpuni.

⁵ T'ukuna ruwasqanmanta tukuy yuyarikuychej, tukuy kamachisqanta sut'inchasqanmantapis.

⁶ Abrahampa miraynin, Tata Diosmanta yuyarikuychej, jinallataj Jacobpa miraynin, pikunatachus Dios ajllakorqa, chaykuna.

⁷ Paymin Tata Diosninchej. Payllamin tukuy kay pachata kamachejqa.

⁸ Waranqa waranqa runa mita pasachun chaypis, pay trato ruwasqanta mana jayk'aj qonqanqachu.

⁹ Abrahamwan trato ruwasqanmanta, Isaacman tilusqanmanta ima manapuni qonqanqachu.

¹⁰ Kamachisqanta jina chay tratota Jacobman qorqa, Israelwan wiñay trato kananpaj.

¹¹ Chaypacha Tata Dios nerqa: Chayaqeyki kananpaj Canaán jallp'ata qosqayki, nispa.

¹² Paykuna pisilla karqanku, Canaanpi waj llajtayoj jina purispa.

¹³ Chantá suyumanta suyu, llajtamanta llajtataj purerqanku.

¹⁴ Chaywanpis Tata Dios mana pipis paykunata llakichinanta saqerqachu, paykunaraykutaj kuraj kamachejkunata kay jinata k'amerqa:

¹⁵ Ajllakusqaykunataqa amapuni llankhankichejchu, amataj sut'inchajniykunatapis imanankichejchu, nispa.

¹⁶ Tata Diosqa Canaanpi yarqhay kananta munarqa, jinataj tukuy ima mikhuyta qhechorqa.

¹⁷ Chantá paykunamanta ñawpajta Egiptoman Joseta kacharqa, pitachus wata runata jina venderqanku, chayta.

¹⁸ Egiptopitaj chakinta cadenawan wataykorqanku, carcelmantaj wisq'aykorqanku.

¹⁹ Chayqa ajina karqa Joséj mosqokusqan junt'akunankama. Chaypacha Tata Diosqa José imatachus nisqan cheqan kasqanta sut'incharqa.

²⁰ Chantá Egiptopi kuraj kamachejqa Joseta kacharipunankuta kamacherqa, pichus ashkha runata kamachejtaj kachariporqa.

²¹ Chaymantataj kuraj kamachejqa Joseta tukuy suyuta kamachinanpaj churarqa, tukuy kapuyninta qhawananpaj ima.

²² Ajinamanta José yachayniyojkunata yachacherqa, kamachejkunata, yanapaj kurajkunata ima yachayniyojman tukucherqa.

²³ Chaymantataj Israelqa, pichus Jacobllataj kashan, chay Egiptoman yaykorqa. Jacobtaj Campa suyunpi waj llajtayoj jina tiyakorqa.

²⁴ Tata Diosqa ayllunta ashkhata miracherqa, Egipto llajtayojkunamantapis aswan kallpayojman Israelta tukucherqa.

²⁵ Chantá Diosllataj Egipto llajtayojkunaj sonqonkuta uj jinaman tukucherqa ayllunta chejninankupaj, Tata Diospa kamachinkunaj contrankuta mana allinta ruwayta yuyanankupaj.

²⁶ Chaymanta Tata Diosqa kamachin Moisesta, chantá ajllasqan Aarontawan kacharqa.

²⁷ Paykunanejta Diosqa ch'innejpi señalkunata ruwarqa, Campa jallp'anpi t'ukuna imakunata ruwarqa.

²⁸ Tata Dios tukuy Egipto suyuta laqhayaykucherqa. Chaywanpis Egipto llajtayojkuna paypa nisqanta mana kasorqankuchu.

²⁹ Diosqa mayukunapi yakuta yawarman tukucherqa, challwakunatataj wañuracherqa.

³⁰ Egipto suyuman, kuraj kamachejpa puñunanman ima k'aylankulakunata junt'aykucherqa.

³¹ Chantá Tata Dios parlajtin, may chhika ch'uspikuna, chantá tiwlakuna ima phuyu jina Egiptoman junt'aykorqanku.

³² Parachinantaqa, chijchi parata parachimorqa, lliuj lliujkunatataj suyunkuman kachaykorqa.

³³ Chaykunaqa Egiptopi kaj uva sach'akunata, higo sach'akunatawan ima ch'anqararqa, jinallataj tukuy sach'akunata q'ara k'aspillata saqerarqa.

³⁴ Ujtawan Dios parlajtin, phinki phinkikunañataj rikhurerqanku. May chhika mana yupay atina jinapuni karqanku.

³⁵ Chantá chaykuna Egiptopi tukuy qhorata mikhukaporqanku, tukuy chajratataj q'ararparerqanku.

³⁶ Jinallataj Diosqa Egipto llajtayojkunaj tukuy kuraj kaj churinkukunata wañucherqa, sapa ayllumanta manchay munasqa kajta.

³⁷ Chaymantataj Tata Dios ayllunta qoriwan, qolqewan q'epirisqata Egiptomanta orqhorqa, ayllun ukhupitaj mana ujllapis onqosqa karqachu.

³⁸ Egipto llajtayojkunataj israelitakunata ripushajta rikuspa, kusikorqanku, imaraykuchus sinch'i mancharisqa kasharqanku.

³⁹ Chaypacha Tata Diosqa israelitakunata llanthunanpaj phuyuchimorqa, ch'isintaj paykunata ninawan k'anchacherqa.

⁴⁰ Mikhunata mañakojtinku, Diosqa yuthukunata paykunaman chayachimorqa, janaj pachamanta t'antawantaj paykunata sajsacherqa.

⁴¹ Chhankata Moisés wajtajtin, yaku jutumorqa, ch'aki pampatataj mayu jina purirerqa.

⁴² Diosqa ñawpa nisqanmanta yuyarikorqa, kamachin Abrahamman tiluspa imatachus nisqanmanta.

⁴³ Ajinata Diosqa ajllakusqan ayllunta Egiptomanta orqhorqa, ajllakusqankunataj mayta kusikorqanku.

⁴⁴ Chantá Dios waj llajtayojkunaj jallp'ankuta ayllunman qorqa. Jinallataj chay llajtayojkunaj llank'aspa poqochisqankutapis qollarqataj.

⁴⁵ Tata Dios ajinata ruwarqa, imaraykuchus pay munarqa israelitakuna paypa nisqanta kasunankuta, kamachisqantataj kasunankuta ima. Tata Dios jatunchasqa kachun.