Salmos 104 - DIOSPA QHELQACHISQ

SALMO 104 Tata Dios tukuy ruwasqanta qhawan

¹ Noqaqa tukuy sonqoywan Tata Diosta yupaychasaj. Tata Diosníy, may jatunmin kanki. Atiywan, jatun kayniykej lliphipiyniykiwantaj p'achallisqa kanki.

² Qanqa k'anchaywan uj mantawan jina qhataykukunki, janajtataj uj toldota jina mast'arqanki.

³ Yaku patapi tiyakunaykita wasichanki. Phuyukunaqa lliphipirishaj carretayki jina kanku, wayraj lijranpitaj purinki.

⁴ Wayrakunaqa chaskiykikuna kanku. Ninaj lawrasqantaj qanpa kamachiykikuna kanku.

⁵ Qanmin kay pachata cimientonpi sayacherqanki, churasqa kasqanmanta mana jayk'aj kuyuchisqa kananpaj.

⁶ Kay pachata ukhu mama qocha qhatarqa, chay yakutaj orqokunata p'ampaykorqa.

⁷ Kamachejtiyki, yakukuna ayqerqanku, jatunmanta parlasqaykita uyarispataj, usqhayllata riporqanku.

⁸ Orqokunaman wicharerqanku, vallekunantataj urayk'orqanku. Maypichus kanankupaj señalarqanki, chay cheqaman rerqanku.

⁹ Qanllataj yakupaj mojonta churarqanki, ama chayta pasananpaj, manaña jallp'ata ujtawan p'ampaykunanpaj.

¹⁰ Chantá qanllataj juturikunata rikhuricherqanki orqokunaj chawpinta rinankupaj, yakuwantaj mayukunata junt'achinankupaj.

¹¹ Chay mayukunamanta tukuy k'ita animalkuna yakuta ujyanku. Chaypi k'ita burrokunapis ch'akiyninkuta thasnullankutaj.

¹² Chay mayu kantupi p'isqokunapis thapachakunku, sach'akunaj thansanpitaj ch'ajwarinku.

¹³ Tata Dios, janaj pacha tiyakunaykimantapacha qan orqokunata qarpanki, chay yakuwantaj jallp'ata sajsachinki.

¹⁴ Animalkunapaj qhorata wiñachinki, runaj tarpusqan chajratapis, runa chay poqoyninta mikhunanpaj.

¹⁵ Vinota runaj sonqonta kusichinanpaj qonki, aceitetapis uyanta lliphipirichinanpaj, mikhunatataj kawsananpaj.

¹⁶ Tata Diospa sach'ankunaqa yakuwan sajsakunku, Libanopi cedropis, kikin makinwan mallkisqan sach'ankunapis.

¹⁷ Chay sach'akunapi juch'uy p'isqokuna thapachakunku, pino sach'apitaj pariwanakuna thapachakunku.

¹⁸ Orqo patapi k'ita cabrakuna kawsakunku, qaqapitaj wisk'achakuna pakakunku.

¹⁹ Qanqa killata ruwarqanki tiempota señalananpaj, intipis mayk'ajchus yaykupunanta yachallantaj.

²⁰ Qanqa laqhata churanki tuta kananpaj, chay laqhapitaj k'ita animalkuna purinku.

²¹ Leonkuna mikhunata mask'aspa qhaparinku, jinataj Tata Dios mikhunata qonanta mañakunku.

²² Inti llojsimojtintajrí, pakakunku, jusk'unkumantaj winkoj yaykupunku.

²³ Chantá runañataj llank'aj llojsin, chajranpitaj ch'isiyankama ruwan.

²⁴ Tata Dios, ruwasqaykeqa may chhikamin. Qanqa tukuy imata sumaj yachayniykiwan ruwarqanki. Kay pachaqa tukuy ima ruwasqaykiwan junt'a kashan.

²⁵ May Jatun Mama Qochapis kallantaj, tukukuynintaj mana rikukunchu. Chaypi mana yupay atina tukuy imaymana animalkuna, jatuchaj, juch'uychaj ima t'impurishanku.

²⁶ Chaypi jatuchaj barcokunapis kayman jaqayman rinku. Jatun sierpe Leviatanpis chayllapitaj kashan, mayqentachus ruwarqanki paywan pujllanaykipaj, chay.

²⁷ Tukuyninku suyanku maychus tiemponpi qan mikhunata qonaykita.

²⁸ Qan mikhunata qaranki, paykunataj mikhunku. Makiykita kicharinki, paykunataj sajsakunankukama mikhunku.

²⁹ Uyaykitachus pakanki chayrí, mancharikunku. Samayninkuta qhechupojtiykitaj, wañupunku, jallp'allamantaj tukupunku.

³⁰ Chantá samayniykita kachamunki chayqa, tukuy watej kawsarinku. Kay pachatapis mosojman tukuchinki.

³¹ Tata Diospa jatun kaynenqa wiñaypaj kachun, ruwasqanpitaj Tata Dios kusikuchun.

³² Tata Dios qhawarimojtin, kay pacha kharkatitin, llankharejtintaj, orqokuna q'oshñirinku.

³³ Noqatajrí kawsayniyoj kanaykama Tata Diosniyman takiykunata takisaj.

³⁴ Tukuy yuyasqay Tata Diospa sonqonta kusichichun, imaraykuchus payllapi kusikuyta tarini.

³⁵ Juchasapakunarí kay pachamanta chinkachisqa kachunku, mana allinta ruwajkunapis amañapuni kachunkuchu. Noqaqa tukuy sonqoywan Tata Diosta yupaychasaj. Tata Dios yupaychasqapuni kachun.