Salmos 103 - DIOSPA QHELQACHISQ

1a

SALMO 103 Tata Diosta tukuy sonqo yupaychasaj

1a (1a) (Davidpa ruwasqan takiy)

¹ (1b) Tukuy sonqoywan Tata Diosta yupaychasaj, tukuy kayniywantaj may llimphu sutinta yupaychasaj.

² Tukuy almaywan Tata Diosta yupaychasaj, allinta ruwapuwasqanmantataj mana qonqasajchu.

³ Paymin tukuy millay ruwasqayta pampachan, tukuy onqoymantapis thañichiwan.

⁴ Payqa jallp'aj sonqonman yaykunaymanta kacharichiwan. Chantá munakuyninwan, khuyakuyninwan ima sonqoyta junt'achin.

⁵ Tata Diosmin tukuy allin kajwan atipachiwan, ankata jinataj kallpachawan.

⁶ Tata Diosqa ñak'arichisqa kajkunapaj cheqan justiciata ruwan.

⁷ Payqa Moisesman imatachus yuyasqanta rejsicherqa, Israel ayllumantaj ruwasqanmanta yachacherqa.

⁸ Tata Diosqa k'acha khuyaj sonqoyoj, mana usqhayllata phiñakoj, may jina khuyakuyniyojtaj.

⁹ Mana sapa kutichu k'amiwanchej, nitaj wiñaypajchu phiñakun.

¹⁰ Mana millayta ruwasqanchejman jinachu kutichiwanchej, nitaj juchanchejman jinachu jasut'iwanchej.

¹¹ Imaynachus janajqa kay pachamanta aswan jatun, ajinallataj payta jatunchajkunapaj khuyakuynenqa may jina.

¹² Imaynachus inti llojsimuynej inti yaykuynejmanta karupi kashan, ajinallatataj payqa juchanchejta noqanchejmanta karunchan.

¹³ Imaynatachus uj tata wawanmanta khuyakun, ajinallatataj Tata Diospis payta may jatun respetowan qhawajkunata khuyakun.

¹⁴ Payqa imamantachus ruwasqa kasqanchejta yachan, jinallataj jallp'allamanta kasqanchejta yuyarikun.

¹⁵ Runaj kawsaynenqa qhora jinalla, campo t'ika jinallataj t'ikarin.

¹⁶ Chay qhoraqa wayraj phukusqallanwan chinkarin, manataj pipis maynejpichus kasqanta yachanchu.

¹⁷ Tata Diospa khuyakuyninrí wiñay wiñaypaj payta may jatun respetowan qhawajkunapaj. Justicianpis tukuy tiempo runakunapaj mana tukukuyniyoj

¹⁸ pikunachus Diospa trato ruwasqanta junt'ajkunapaj, kamachisqanta kasunamanta mana qonqajkunapaj ima.

¹⁹ Tata Dios janaj pachapi kamachinan tiyanata churarqa, chaymantapachataj tukuyta kamachin.

²⁰ Angelkuna, Tata Diosta yupaychaychej, pikunachus atiyniyojkuna, kamachisqanta junt'ajkuna, chantá nisqanta usqhayllata kasojkuna ima kankichej.

²¹ Tukuy paypa soldadonkuna, Tata Diosta yupaychaychej, pikunachus munayninta ruwaspa kamachisqanta junt'ajkuna.

²² Paypa tukuy ruwasqan, Tata Diosta yupaychaychej, kamachiyninpi tukuy kajkuna. Noqapis tukuy sonqoywan Tata Diosta yupaychallasajtaj.