Salmos 102 - DIOSPA QHELQACHISQ

SALMO 102 Llakisqa runa Diosmanta mañakun

¹ 1 (2) Tata Dios, mañakususqayta uyariway. Munay ari, qhaparikusqay qanman chayamunanta.

² 2 (3) Ama noqamanta karunchakuwaychu, llakiywan ñit'isqata rikuwaspa. Wajyakusojteyqa, usqhayllata uyariway.

³ 3 (4) Kawsayneyqa q'oshñi jina chinkapushan. Tulluypis nanaymanta t'ajarishan, nina k'ajayman rijch'akojta.

⁴ 4 (5) Sonqoy umphu kashan, qawisqa qhora jina. Mikhuypis mana jap'iwanchu.

⁵ 5 (6) Chhikata ayqosqaypi aycha qarayqa tulluyman k'askaykun.

⁶ 6 (7) Noqa ch'innejpi juku jina kani, raqaykunapi ch'useqa jina.

⁷ 7 (8) Mana puñunichu. Wasi patapi sapan purikoj p'isqo jina kani.

⁸ 8 (9) Awqaykunaqa sapa p'unchay alqochakuwanku, sutiytataj maldicinawankupaj oqharinku.

⁹ 9 (10) T'antata mikhunaytaqa ushphallata mikhuni. Ujyanaypis waqayniywan chajrukun.

¹⁰ 10 (11) Sinch'i k'arajta phiñakusqaykirayku, qan oqhariwarqanki, wijch'urpariwarqanki ima.

¹¹ 11 (12) Kawsayneyqa chinkapoj llanthu jinalla ripun, qhora jinataj ch'akipushani.

¹² 12 (13) Qantajrí, Tata Dios, wiñaypaj kallankipuni, sutiykitaj wiñaypaj yuyarisqallapuni kanqa.

¹³ 13 (14) Sayarikuspa, Sionmanta khuyakuy, imaraykuchus khuyakunaykipaj tiempo chayamunña. Israelpa juchanta pampachanaykipaj phaneqa chayamunña.

¹⁴ 14 (15) Kamachiykikunaqa Sión llajtaj ruminkunata munakunku. Chayrayku raqayllataña rikojtinku, sonqonku nanan.

¹⁵ 15 (16) Tata Dios, sutiykita tukuy suyu jatunchanqanku. Kay pachamanta kuraj kamachejkunapis atiyniyoj kasqaykita rejsisonqanku,

¹⁶ 16 (17) imaraykuchus qan, Tata Dios, Sión llajtata watej sayarichinki. Ajinata ruwaspa, atiyniyoj kasqaykita rejsichinki.

¹⁷ 17 (18) Qanqa mana piniyoj runaj mañakusqanta uyarinki, mañakusqantapis mana qhesachankichu.

¹⁸ 18 (19) Kayqa qhelqasqa qhepakuchun, qhepata jamojkuna Tata Diosta yupaychanankupaj.

¹⁹ 19 (20) Tata Diosqa janaj pachamantapacha kay pachata qhawamorqa. Chaymantapacha kay pachata rikumorqa,

²⁰ 20 (21) pikunachus presochasqa kanku, chaykunaj waqasqankuta uyarinanpaj, wañunankupaj juchachasqa kajkunatataj kacharichinanpaj.

²¹ 21 (22) Chay jinamanta Sionpi Tata Diospa sutin rejsichisqa kanqa, Jerusalén llajtapitaj pay yupaychasqa kanqa.

²² 22 (23) Chaypacha tukuy suyumanta runa tantakuspa, Tata Diosta yupaychanku.

²³ 23 (24) Wayna kashajtillayraj, Diosqa kallpayta qhechuwan, unayta kawsanaymantataj pisiyachin.

²⁴ 24 (25) Chantá noqa mañarikorqani: Diosníy, qanqa wiñay wiñaypaj kawsanki. Ama munaychu manaraj wañunaypi wañunayta, nispa.

²⁵ 25 (26) Qallariymantapacha kay pachata qan ruwarqanki, janajtapis qanllataj ruwarqanki.

²⁶ 26 (27) Tukuy chaykunaqa chinkaponqanku. Qantajrí wiñaypaj sayanki. Tukuynin p'acha jina mawk'ayaponqa. Qantajrí chaykunata p'achata jina lluch'uspa, wajta churanki.

²⁷ 27 (28) Qanrí kikillanpuni kanki, wataykikunapis ni jayk'aj tukukonqachu.

²⁸ 28 (29) Kamachiykikunaj wawankukunaqa mana ni imata manchachikuspa tiyakonqanku, mirayninkutaj wiñaypaj kawsanqanku.