Salmos 10 - DIOSPA QHELQACHISQ

SALMO 10 Tata Dios yanapananta mañakuna

¹ Tata Dios, imaraykutaj karupi kashankiri? Imaraykutaj llakiypi kashajtiy, pakakunkiri?

² Millayta ruwaspa purejqa wapuykachaspa, wajcha runata qhatiykachan. Chaywanpis paypa tojlla churasqallanpitaj ch'ipaykusqa rikhurenqa.

³ Millayta ruwaspa purejqa mana allin kajta munasqanmanta jatunchakun. Qolqemanta wañusqa runata saminchan, Tata Diostarí pisipaj qhawan.

⁴ Payqa Diosta mana mask'anchu. Chantá nin: Dios mana kanchu. Cuentata mañawajqa mana pipis kanchu, nispa. Yuyayninpeqa Diospi yuyana mana kanchu.

⁵ Tukuy ima ruwasqanpipis allillanpuni rin, justiciayki imaynachus kasqan paypa umanman mana yaykunchu. Payqa tukuy awqankunamantapis alqochakun.

⁶ Sonqonpi nin: Noqaqa mana jayk'aj urmasajchu, llakiypis mana jayk'aj chayamuwanqachu, nispa.

⁷ Siminpeqa runa masinpaj mana allinta munapuna junt'a kashan, llullakunawan, q'otiyanawan ima. Simin ukhupeqa sonqota nanachinapaj parlana, mana allinta parlanawan ima pakasqa kashan.

⁸ Juch'uy llajtakunapi wateqaspa purin, mana juchayojta pakaypi wañuchinanpaj. Pisi kallpayojtapis qhawashallan.

⁹ León jina jusk'unmanta wajchata wateqan, rikhurimojtin patanman phinkiykunanpaj. Jap'ispataj, tiyapusqanta qhechun.

¹⁰ Phinkiykunanpaj jina lip'iykun, mana piniyojkunataj makinman urmanku.

¹¹ Millay runaqa sonqonpi nillantaj: Dios noqanchejmanta qonqapun, jinataj uyanta qhataykukun mana imatapis rikunanpaj, nispa.

¹² Sayariy, Tata Dios, makiykita oqhariy, amataj mana kutichikuyta atejkunamanta qonqapuychu.

¹³ Imaraykutaj millayta ruwaspa purejkuna qanta pisipaj qhawasuspa, sonqonkupi ninku: Dios mana cuentata mañawasqaykuchu, nispari?

¹⁴ Qanqa phiñakunapaj jina mana allin ruwasqankuta rikorqanki, imatachus ruwasqankuman jinataj pagonkuta qopunki. Mana kutichikuyta atejkuna qanllapi atinikusunku. Qanllamin wajcha wawakunata yanapajqa kanki.

¹⁵ Chayrayku millayta ruwajkunaj makinkuta p'akiray, millay ruwasqankumantataj cuentata mañay, manaña imamantapis juchachanayki kanankama.

¹⁶ Tata Diosqa wiñaypaj Kuraj Kamachejmin. Qanman mana kutirikojkunarí llajtankumanta wijch'usqa kanqanku.

¹⁷ Tata Dios, pisi tiyapuyniyojkunaj mañakusqankuta uyarinki. Qan paykunaj sonqonkuta oqharinki, uyarinkitaj.

¹⁸ Qanqa wajcha wawapaj, ñak'arichisqa runapajpis justiciata ruwanki, jallp'amanta ruwasqa runa amaña paykunata watej manchachinanpaj.