Proverbios 8 - DIOSPA QHELQACHISQ

Yachayniyoj kana jatunchasqa

¹ Yachayqa uj warmipis kanman jina jatunmanta qhaparin, yuyayniyoj kaytaj uyarichikun.

² Yachayqa loma patapi, ñankuna tinkuypi ima sayan.

³ Llajtaman yaykuna punkukunapi, chantá wasi punkukunapi ima kay jinata uyarichikun:

⁴ Runakuna, qankunata wajyamuykichej. Runakuna, qankunata parlapayaykichej.

⁵ Mana yachayniyojkuna, umayoj kaychej. Wampukuna, allin yuyayniyoj kayta yachaqakuychej.

⁶ Uyariwaychej, sumaj imakunata parlasqaykichej. Imachus cheqa kajmantawan nisqaykichej.

⁷ Imatachus nisqaykichej, chayqa cheqanmin. Noqaqa llullakuyta millachikuni.

⁸ Tukuy nisqayqa cheqanpuni. Simiypeqa mana imapis q'ewisqachu, nitaj imapis mana allin kanchu.

⁹ Pichus yuyayniyoj kajpaj, allintataj umanpi jap'eqajpaj, imatachus nisqayqa sut'i, cheqantaj kanku.

¹⁰ Qolqe metalta, sumaj qorita ima mask'anaykichejtaqa yachayta, allin imakunata rejsiytawan mask'aychej, nispa.

¹¹ Yachayniyoj kayqa sumaj valorniyoj rumikunamantapis astawan valen. Ni aswan munana kajpis yachaywan kikinchakunmanchu.

¹² Yachayniyoj kayqa nillantaj: Noqaqa yuyayniyoj kaywan khuska tiyakuni. Imata ruwanaypajpis allintaraj yuyaycharikuni.

¹³ Pikunachus Tata Diosta jatun respetowan qhawajkunaqa mana allin kajta chejnikunku. Chayrayku noqa chejnikuni jatunchakuyta, runaykachayta, millay puriyta, llullakuyta ima.

¹⁴ Yuyaychay, yuyayniyoj kaywan ima noqajta kanku. Jinallataj yachayniyoj kay, atiypis noqajllatataj.

¹⁵ Noqanejta kuraj kamachejkunaqa kamachinku, kurajkunapis justiciata ruwanku.

¹⁶ Noqanejta kamachejkuna kamachinku, tukuy kurajkunataj kay pachapi kamachinku.

¹⁷ Noqaqa pichus munakuwajta munakuni. Pikunachus tukuy sonqo mask'awajkunataj tariwanku.

¹⁸ Qhapajyaywan, allinpaj qhawasqa kaywan ima noqawan kashanku. Jinallataj runayaypis, allinta qhawasqa kaypis noqawan kashallankutaj.

¹⁹ Noqaj qosqayqa ch'uyachasqa qorimantapis astawan allin. Imatachus jaywasqayqa aswan sumajmin ch'uya qolqemanta nisqaqa.

²⁰ Noqaqa cheqan ñanta purini, justiciata ruwaspa purini.

²¹ Pikunachus munakuwajkunamanqa chayaqeta qoni. Wasinkutapis qhapaj kaywan junt'achini.

²² Tata Dios kay pachata ruwayta qallarishaspa, noqataraj ñawpajta ruwawarqa, manaraj tukuy imatapis ruwashaspa.

²³ Wiñaymantapachapuni ruwawarqa, manaraj kay pachata ruwashaspa.

²⁴ Manaraj mama qochakuna kashajtinku, ruwawarqa. Chaypacha manaraj mayukuna, nitaj yaku juturikunapis karqankurajchu.

²⁵ Manaraj orqokunapis, lomakunapis kashajtinku, Tata Dios ñapis yumawarqaña.

²⁶ Kay pachatapis, campokunatapis manaraj ruwarqachu, nitaj jallp'apis kay pachapi ruwasqachu karqa.

²⁷ Maypachachus pay janajta mama qochaj patanpi sayacherqa, chaypacha noqa chaypi kasharqaniña.

²⁸ Maypachachus Tata Dios janajman phuyukunata churarqa, ukhu mama qochaj juturinkunatataj sumajta sayacherqa chaypacha, noqa chaypi karqani.

²⁹ Maypachachus mama qochaj yakunta ama wasaykunanpaj kamacherqa chaypacha, maypachatajchus jallp'aj cimientonkunata churasharqa chaypacha,

³⁰ noqa paywan khuska karqani, tukuy imata maypichus kananman churaspa. Sapa p'unchay payta kusicherqani, paypa ñawpaqenpitaj kusikoj kani.

³¹ Kay pachata ruwasqanpi sink'urispa, kusikorqani, Tata Diospa ruwasqan runakunaraykutaj anchata kusikorqani.

³² Kunanqa wawaykuna, ama jina kaspa uyariwaychej: Kusikuyniyojmin kanku yachachisqayman jina kawsakojkunaqa.

³³ Uyariychej imatachus yachachisqayta, qankunapis yachayniyoj kanaykichejpaj. Amataj yachachisqayta pisipaj qhawaychejchu.

³⁴ Kusikuyniyojmin pichus uyariwajqa, sapa p'unchay mana puñuspa wasiy punkullapi sayajqa.

³⁵ Pichus noqata tariwajqa kawsayta tarin, jinallataj Tata Diospa khuyakuynintapis tarillanqataj.

³⁶ Pichus contraypi juchallikojrí, payllataj mana allin kawsayta mask'akun. Pichus noqata chejniwajqa wañuyta mask'akun.