Proverbios 6 - DIOSPA QHELQACHISQ

Garante jina mana sayanachu

¹ Wawáy, sichus kawsaqeykimanta garante jina sayanki chayqa, chayrí waj runaj manunta paganaykita ninki chayqa,

² qanllataj tojllata churakushanki, parlasqaykiraykutaj ch'ipasqa rikhurinki.

³ Wawáy, runaj makinpiña kashaspa, chaymanta kacharichikunaykipaj kayta ruway: K'umuykuspa, kawsaqeykiwan parlamuy amaña garanteta jina sayachisunanta.

⁴ Ama puñuychu, amataj ch'irmillaypischu.

⁵ Manachayqa ayqekuy imaynatachus taruka jap'ejmanta ayqekun, jinallataj p'isqopis tojllamanta ayqekun, ajinata.

Mana qhella kanachu

⁶ Qhella runa, sik'imirakunata qhaway, imatachus ruwasqankuta qhawaspa yachaqakuy.

⁷ Sik'imirakunaqa ni pi kamachishajtin, nitaj pipis imatachus ruwanankuta nishajtin,

⁸ mikhunata q'oñi tiempopi tantanku. Chajra oqharina tiempopitaj mikhunankuta waqaychanku.

⁹ Qhella, mayk'ajkamataj puñullankipuniri? Mayk'ajtaj puñusqaykimanta jatarinkiri?

¹⁰ Uj chhikanta puñunaykikama, uj chhikanta ch'irminaykikama, makiykita jap'ikuspa samarinaykikama,

¹¹ wajchayayqa chayamusonqa. Pisichikuypis suwa runa jina pataykiman urmaykamusonqa.

Millayta ruwaj runa

¹² Millayta ruwaj runaqa mana p'enqakuspa, llullata parlaspallapuni purin.

¹³ Wajkunata q'otiyananpaj ñawinta ch'irmirin, chakinta kuyurichin, ruk'ananwantaj señalan ima.

¹⁴ Sonqonpirí millay ruwayta yuyayllawan junt'a kashan, tukuy tiempo mana allinta ruwanallapi yuyan. Tukuynejpi runata maqanachispallapuni purin.

¹⁵ Chayrayku llakeyqa ujllata mana yuyasqallamanta payman chayamonqa. Ujllapi uj ñawi ch'irmiyllapi urmachisqa kanqa.

Tata Dios imatachus chejnikun

¹⁶ Tata Diosqa qanchis imakunata anchatapuni chejnikun:

¹⁷ May kasqankuta yuyakoj runakunata, llullakuspa parlajkunata, mana juchayojta wañuchejkunata ima.

¹⁸ Dios chejnikullantaj sonqonpi mana allin kajta ruwayta wakichejkunata, millay ruwanaman usqhayta purejkunata,

¹⁹ llulla testigoj llullakusqanta, wawqepurata phiñanachejkunata ima. Chaykunata Tata Diosqa chejnikun.

Ama wasanchanapaj k'amiy

²⁰ Wawáy, tataykej kamachisusqanta kasuy, amataj mamaykej yachachisusqantapis qonqaychu.

²¹ Yachachisusqankuta sonqoykipi jap'ikuy, kunkaykimantaj walqata jina warkhuykukuy.

²² Mayta rejtiyki, yachachisusqanku puriyniykipi pusasonqanku. Puñushajtiykipis, waqaychasonqanku, rijch'arejtiykipis, qanwan parlanqanku.

²³ Cheqamanta kamachisqankoqa jap'ichisqa lámpara jina, yachachiyninkutaj k'anchay jinallataj. K'amiykuna, yuyaychaykuna ima, imaynatachus kawsanaykita rikuchisonqanku.

²⁴ Chaykunaqa millayta ruwaj warmimanta jark'asonqa, qosanta wasanchaj warmej misk'i sonqo suwa parlasqanmantawan.

²⁵ Ama k'achita kasqanqa sonqoykita suwasuchunkuchu. Qhawarisusqanpis ama sonqoykita aysachunchu.

²⁶ Phisu warmeqa phisu phataraykulla ukhunta pimanpis jaywan. Qosayoj warmiwan khuchichakuyrí runaj tukuy kawsayninta pierdechin.

²⁷ Pipis ninata qhasqonpi apaykachashaspa, manachu p'achanta ruphachikonqari?

²⁸ Pichus nina patata purejqa chakinkunata ruphachikonqapuni.

²⁹ Wajpa warminwan puñuykojpajpis ajinallataj kanqa. Mana juchachasqa kanamanta ayqenqachu.

³⁰ Yarqhayninta thasnunanrayku suwakojtaqa mana pipis juchachanchu.

³¹ Suwashaspachus jap'ichikun chayrí, imatachus suwasqanmanta qanchis jinatawan kutichipunan tiyan, wasinpi tukuy kapuyninta vendespapis.

³² Chaywanpis, qosayoj warmiwan khuchichakojrí suwamanta nisqaqa astawan mana yuyayniyoj. Chay warmiwan puñuykuspa, makinllawantaj mana allin kawsayta mask'akushan.

³³ Chay runaqa p'enqaypi rikhurenqa, maqachikuytapis tarikonqa, p'enqachisqa kayta tarikusqantaj mana jayk'ajpis chinkanqachu.

³⁴ Celosakoyqa chay qosaj sonqonta t'impurichin, vengakuna p'unchaypitaj chay runamanta mana khuyakonqachu.

³⁵ Celosakuywan phiñasqa qosaqa ni imata jap'ikuyta munanqachu, nitaj ni ima sonqonta tiyaykuchiyta atenqachu, ni imata jaywashajtinkupis.