Proverbios 30 - DIOSPA QHELQACHISQ

Agurpa yachaywan nisqankuna

¹ Masá sutiyoj llajtamanta, Jaquéj churin Agurpa sut'inchasqan kaykuna kanku. Agurqa Itielman, Ucalmanwan kay jinata parlarqa:

² Noqaqa tukuy runamanta astawan wampu kani, manataj runa jina yuyaychakuyta atinichu.

³ Noqaqa mana yachayta jap'eqanichu, manallataj llimphu kaj Diosmanta imatapis yachanichu.

⁴ Pitaj janaj pachaman wicharerqa, urayk'amorqatajri? Pitaj wayrata makinpi q'apiyta atinmanri? Pitaj mama qochata llijllapi q'epichaykorqari? Pitaj kay pachaj mojonninkunata churarqari? Chaytachus yachanki chayqa, willaway: Imataj paypa sutinri? Imataj churinpa sutinpisri?

⁵ Tata Diospa tukuy nisqanqa cheqapuni. Diosqa paypi atinikojkunata jark'akun.

⁶ Nisqanman ama imatapis yapankichu. Yapankichus chayqa, pay k'amisonqa. Pajtataj llullata jina rikhurichisunkiman.

⁷ Diosníy, iskay imakunallata mañakuyki, manaraj wañupushajtiy, chaykunata qoway.

⁸ Ñawpajta, mana jayk'aj llullakunaypaj yanapaway. Qhepantarí ama qhapajyachiwaychu, nitaj wajchayachiwaychu. Sapa p'unchay kawsanaypaj imatachus necesitasqallayta qoway.

⁹ Sichus ashkha imayoj kayman chayqa, qanmanta qonqapuspa, niyman: Pitaj Tata Dios kasqari? nispa. Sichus pisichikuyman chayrí, suwamanñataj qokuyman. Ajinamanta sutiykita p'enqaypi rikhurichiyman.

¹⁰ Ama wata runaj contranta parlaychu patronnin uyarishajtin. Pajtá wata runa maldicisunkiman, chaymantataj mana allinpi rikhuriwaj.

¹¹ Wakinkuna tatankuta maldicinku, mamankutapis mana saminchankuchu.

¹² Wakinkuna llimphu kasqankuta yuyakunku, chaywanpis millayta ruwasqankumanta mana llimphuchakunkuchu.

¹³ Wakenqa may kasqankuta yuyakunku, runa masinkutataj pisipaj qhawanku.

¹⁴ Wakinkunaj kirunkoqa espadakuna jina kanku, k'ama kirunkupis khuchuna jina. Paykunaqa suyupi kaj wajchakunata tukuchinanku, pisichikojkunatataj oqoykunku.

¹⁵ Yawar ch'onqaj khurojta iskay uñan tiyan, chaykunataj: Qoway, qoway, nispallapuni qhaparinku. Kinsa, ichá tawa imakuna ni jayk'aj sajsakuyta atinkuchu. Kaykuna kanku:

¹⁶ Jallp'aj sonqon, mana wawata rejsej warmi, may ch'aki jallp'a, mana thasnukoj nina lawray ima. Chay tawantin mana sajsakuyta atinkuchu.

¹⁷ Pichus tatanta pisipaj qhawan, jinallataj paya mamanmanta alqochakun chayqa, chay runaj ñawinta qharqañakuna sik'ichunku, ankakunapis kawsashajta oqoykuchunku.

¹⁸ Kinsa, ichá tawa imakuna maytapuni t'ukuchiwanku, chaykunamantataj mana unanchayta atinichu. Kaykuna kanku:

¹⁹ Janajpi imaynatachus ankaj phawasqan, qaqapi katarej suchusqan, mama qochapi barcoj purisqan, qhari warminman imaynatachus chayasqan ima.

²⁰ Khuchichakoj warmeqa kay jinaman rijch'akun: Pichus suwasqa mikhunata mikhuytawan, siminta pichakuspa nin: Mana ima millaytapis ruwanichu, nispa, chayman.

²¹ Kinsa ichá tawa imakuna kay pachata kharkatitichin, chaykunatataj ni rikullaytapis munanichu. Kaykuna kanku:

²² Kamachi kashaspa, kuraj kamachejman tukusqan, wampupis qhapajman tukusqan,

²³ chejnisqa warmi qosayoj rikhurisqan, uj kamachi warmi patronanpa qosanta qhechoj ima.

²⁴ Kay pachapi tawa juch'uy animalkuna juch'uy kaspapis, yachayniyojkunamanta astawan yachayniyoj kanku. Chaykunataj kaykuna kanku:

²⁵ Sik'imirakuna mana kallpayoj kaspapis, chajra oqharina tiempopi ashkha mikhunata tantanku.

²⁶ Wisk'achakuna mana kallpayoj kaspapis, chhankakunapi wasichakunku.

²⁷ Phinki phinkikuna mana kuraj kamachejniyoj kaspapis, tukuyninku sinrulla cheqanta ririnku.

²⁸ Ararankhakuna makiwan jap'iy atina kashaspapis, kuraj kamachejpa wasinpi kashanku.

²⁹ Kinsa, ichá tawa imakuna k'achituta purejkuna kanku. Chaykunataj kaykuna kanku:

³⁰ Leonqa tukuy animalmanta aswan kallpayoj kaspa, manapuni imamantapis manchachikunchu.

³¹ Jinallataj jatunchakoj gallo, chivopis, uj kuraj kamachej soldadonkunaj ñawpaqenta rejpis may k'achituta purin.

³² Sichus wampu jina jatunchakorqanki chayqa, chayrí runa masiykej contranta mana allinta ruwanaykipaj wakichikorqanki chayqa, allinta unancharikuy.

³³ Sichus lecheta qaywinki chayqa, mantequillata orqhonki. Senqaykitachus ancha sinch'ita pichakunki chayqa, senqaykimanta yawarta suruchinki. Kikillantaj sichus runa masiykita k'arajta phiñachinki chayqa, maqanakuta tarikunki.