Proverbios 3 - DIOSPA QHELQACHISQ

Imaynatachus yachayta tarina

¹ Wawáy, yachachisusqaymanta ama qonqapuychu, kamachisqaytataj sonqoykipi waqaychay.

² Chantá unayta kawsakunki, may sonqo junt'asqataj tiyakunki.

³ Khuyakuytawan, cheqa kajtawan ama jayk'ajpis saqeychu. Qanqa chaykunata apaykachay uj walqapis kanman jinata. Chaykunatataj sonqoykipi ukhupi t'illmiykuy.

⁴ Ajinata ruwaspa, Tata Diospa khuyakuyninta tarinki. Jinataj Tata Diospis, runakunapis allinpaj qhawasonqanku.

⁵ Tukuy sonqoykiwan Tata Diospi atinikuy, amataj qanpa yachaynillaykipeqa atinikuychu.

⁶ Tukuy ima ruwasqaykipi Tata Diosmanta yuyarikuy. Paymin cheqan ñanta pusasonqa.

⁷ Ama may yachayniyoj kasqaykita yuyakuychu. Astawanpis Tata Diosta may jatun respetowan qhawaspa, mana allin kajta ruwanamanta t'aqakuy.

⁸ Chaymá ukhuykipaj sumaj jampi jina kanqa, ukhuykitapis kallpachanqa.

⁹ Tukuy kapuyniykiwan Tata Diosta jatunchay, jinallataj chajraykej ñawpaj kaj poqoyninwan ima.

¹⁰ Ajinata ruwajtiyki, chajraykej poqosqan pirwaykikunata atipanqa, jinallataj vino jallch'anaykikunapis phullchirenqa.

¹¹ Wawáy, Tata Dios cheqan ñanman churasuyta munaspa, jasut'isusqanta ama pisipaj qhawaychu. Jinallataj paypa k'amisqantaqa amallataj sajrapaj jap'iychu,

¹² imaraykuchus Tata Diosqa, pitachus munakun, chayta cheqan ñanman churan, imaynatachus uj tata munasqa wawanta cheqan ñanman churan, ajinata.

¹³ Kusikuyniyojmin yachayniyoj kayta tarej runaqa, pichus yuyayniyoj kayta jap'ejqa,

¹⁴ imaraykuchus chayqa aswan allinmin qolqemanta nisqaqa. Poqoyninpis astawan valorniyoj qorimanta nisqaqa.

¹⁵ Yachayniyoj kayqa lliphipishaj rumimanta nisqa aswan valorniyoj. Imatachus astawan munasqaykipis manapuni yachaywan ninakunchu.

¹⁶ Yachayniyoj kayqa unay kawsayta qoyta munasunki, jinallataj qhapajyayta, allinpaj qhawasqa kaytawan ima.

¹⁷ Yuyaychasqanman jina purinaqa ima munay. Chayninta pureyqa sonqo tiyaykusqa kawsaymin.

¹⁸ Yachayniyoj kayta pichus tarejpajqa kawsay sach'a jina. Kusikuyniyojmin kanku chayta jap'ispa mana kacharejkunaqa.

¹⁹ Tata Diosqa kay pachata sumaj yachaywan ruwarqa, janajtapis sumaj yuyaywan sayacherqa.

²⁰ Diosqa yachayninwan mama qochata t'aqarqa, phuyukunamantataj chhullachimorqa.

²¹ Wawáy, yachayniyoj kaymanta, allinta yuyaychakuspa ruwanamanta ima ama qonqapuychu.

²² Chayqa kawsayniykipi juturi jina kanqa, walqa jinataj kunkaykita k'achanchanqa.

²³ Chaypacha ñanniykita ni imamanta manchachikuspa purinki, manataj misk'ankichu.

²⁴ Puñukapuspa, ni imamanta manchachikunkichu, sumaj misk'itataj puñurikunki.

²⁵ Kaymanta jinalla ñak'ariykuna chayaykamusojtenqa, mana manchachikunkichu, nillataj mana allinta ruwajkunapaj ñak'ariy jamojtinpis.

²⁶ Tata Dios qayllaykipi kashan. Paymin tojllaman ama urmanaykipaj waqaychasonqa.

²⁷ Pichus imapi khuyarinaykita mañakusojtenqa, yanapariy. Atinaykipaj jina kashajtenqa, yanapariypuni.

²⁸ Ama q'ayapaj saqeychu, runa masiykiman qonaykipaj imachus makiykipi kashajtenqa.

²⁹ Wasi masiyki qanpi atinikuspa tiyakun. Chayrayku ama mana allin kajta paypa contranta wakichiychu.

³⁰ Ama piwanpis manakajllamanta phiñanakuychu, mana imatapis contraykipi ruwashasojtenqa.

³¹ Millay runaj ruwasqantaqa ama moq'eychu, nitaj mana allin ruwasqantapis yachapayaychu.

³² Tata Diosqa millayta ruwajkunata chejnikun, cheqanta ruwajkunawantajrí allinta kawsakun.

³³ Tata Diosqa millayta ruwajpa ayllunta maldicin, cheqan runaj aylluntatajrí saminchan.

³⁴ Alqochakojkunamantaqa Tata Dios asiykukun, llamp'u sonqoyojkunamantajrí k'acha kayninta rikuchin.

³⁵ Tata Dios yachayniyojkunata jatunchan, mana yuyayniyojkunatataj p'enqachin.