Proverbios 23 - DIOSPA QHELQACHISQ

-6 -

¹ Sichus uj allin rejsisqa wiraqocha wajyasunki paywan mikhunaykipaj chayqa, sumajta qhawakuy pejpa ñawpaqenpichus kashasqaykita.

² Anchatapuni yarqhayasunki chaypis, pisillata mikhuy.

³ Ama misk'i mikhunankunata munapayaychu, imaraykuchus q'otiyayta munashasunkiman.

-7 -

⁴ Ama anchata kallpakuychu qhapajyayta mask'aspa, nitaj chayllapipuni yuyaychu.

⁵ Qhapajyayqa mana unaypajchu, qhawarinaykipajtaj manaña kanqachu. Anka jina phawaspalla chinkapun.

-8 -

⁶ Ama mich'a runawan mikhoj tiyarikuychu, nitaj misk'i mikhunantapis moq'eychu.

⁷ Payqa mashkhatachus valesqallanpi yuyashan, siminwantaj nisunki: Mikhuy, ujyay, nispa. Chaywanpis sonqonpeqa chaymanta llakikushan.

⁸ Chaymantaqa imatachus mikhusqaykita lansarpanki, misk'i simiwan parlasqaykitaj qhasillapaj kanqa.

-9 -

⁹ Ama wampu runata imatapis yuyaychaychu, imaraykuchus yuyaychasqaykita pisipaj qhawanqa.

-10 -

¹⁰ Ama ñawpa mojonkunata suchuchinkichu, nitaj wajcha wawakunaj jallp'ankumanpis yaykukapunkichu.

¹¹ Paykunata jark'akoj Diosqa manchay atiyniyojmin, paykunata jark'akuspataj, contraykipi sayaykonqa.

-11 -

¹² Wajkunaj yachachisqankuta kusiy sonqowan jap'ikuy, yachaywan nisusqankuta sumajta uyariy.

-12 -

¹³ Wawataqa wanananpaj jasut'ispa, cheqan ñanman churay. Seq'osqaykiwanqa mana wañonqachu.

¹⁴ Manachayqa, varawan seq'ospa, wañunanmanta payta kacharichinki.

-13 -

¹⁵ Wawáy, sichus sonqoykipi yachay tiyan chayqa, noqajtapis sonqoyqa kusikullanqataj.

¹⁶ Cheqan kajta parlasqaykita uyarispa, anchata kusikusaj.

-14 -

¹⁷ Ama juchasapakuna imaynatachus kawsasqankuta moq'espa qhawaychu. Aswanpis Tata Diosta kasukuspa kawsay.

¹⁸ Ajinaqa qanta qhepanejman allin risonqa, imatachus suyakusqaykitaj mana qhasipajchu kanqa.

-15 -

¹⁹ Allinta uyariway, wawáy, yachachisusqaytapis sumajta jap'ikuy. Allinta ruwaspallapuni puriy.

²⁰ Ama machakojkunawan tantakuychu, nitaj anchatapuni mikhojkunawanpis.

²¹ Machakojkunawan, ashkhata oqojkunawanqa wajchayanku, qhellakunataj p'achamantapis usonqanku.

-16 -

²² Pichus yumasoj tataykita uyariy. Mamaykitapis payayajtin, ama pisipaj qhawaychu.

²³ Cheqa kajta rantikuy, amataj vendeychu. Jinallataj yachaytapis, unanchaytapis, yuyayniyoj kaytapis amallataj vendeychu.

²⁴ Cheqan runaj tatanqa mayta kusikun. Yachayniyoj churita yumajqa payrayku kusikullantaj.

²⁵ Tataykiwan mamaykiwanqa kusikuchunku, pichus paqarichikusojqa kusikuchunpuni.

-17 -

²⁶ Wawáy, tukuy sonqoykiwan uyariway. Imaynatachus kawsasqayta qhawaspa qhatiy.

²⁷ Phisu warmeqa ukhu laqha pujyu jina, qosanta wasanchaj warmitaj k'ullku pujyu jina.

²⁸ Chay warmeqa suwa jina wateqan, ashkha qharikunata juchallichinanpaj.

-18 -

²⁹ Pipajtaj ñak'ariy? Pipajtaj llakiyri? Pipajtaj phiñakuyri, waqaspataj puriyri? Pipajtaj maqachikunari? Pipajtaj pukayasqa ñawilla purinari?

³⁰ Chayqa vinota mana saqeyta munajkunapaj, waj machachina ujyanata mask'ajkunapaj ima.

³¹ Ama vinota qhawaychu, imaynatachus pukayarisqanta, nitaj imaynatachus lliphipirisqantapis. Vinoqa wijsaman llamp'ulla yaykurin.

³² Ujyaykusqamantarí, katari jina khanikun, nanachikuntaj.

³³ Ñawiykeqa mana kajkunata rikonqa, simiykitaj mana parlanata thawtenqa.

³⁴ Mama qocha chawpipi puñushasqaykita yuyanki, jatun barcoj k'aspinpipis ch'ipakuspa puñushawaj jina.

³⁵ Chantá ninki: Wajtawanku, nitaj nanachiwankuchu. Jasut'iwanku, nitaj yuyakunichu. Yuyayniyman kutiriytawanpis, vinota astawan mask'amusaj, nispa.