Proverbios 19 - DIOSPA QHELQACHISQ

¹ Cheqanta kawsakoj wajcha runaqa aswan allin, pichus ch'awka wampu kaj runamanta nisqaqa.

² Mana allinta qhawarikuspa imatapis ruwanaqa mana allinchu. Pillapis usqhayllata imatapis ruwarparejqa pantan.

³ Runaj wampu kaynenqa pay kikinta cheqan ñanmanta pantachin. Chaywanpis Tata Diosta juchachaspa sonqonpi paypaj phiñakun.

⁴ Qhapaj runaqa ashkha kawsaqekunayoj. Wajcha runajtarí mana ni uj kawsaqellanpis kanchu.

⁵ Llullakuspa parlaj testigoqa jasut'isqapuni kanqa. Llulla runaqa chaymanta mana ayqenqachu.

⁶ Mana mich'akuspa imatapis qoj runataqa kawsaqepaj tukuy mask'anku.

⁷ Wajcha runataqa wawqenkunapis chejninku. Astawanraj kawsaqenkunaqa paymanta karunchakonqanku. Yanapanankuta mask'aspapis, mana tarenqachu.

⁸ Pichus imatachus yachasqanta ruwajqa pay kikinta munakun. Chantá tukuy imapi allin renqa.

⁹ Llullakuspa parlaj testigoqa jasut'isqapuni kanqa. Llulla runaqa wañonqa.

¹⁰ Wampu runapaj qhapaj jina kawsanaqa mana paypaj jinachu, nitaj allinchu uj wata runa kurajkunata kamachinanqa.

¹¹ Yuyayniyoj runaqa mana phiñakuyninwan apachikunchu. Phiñakuyta qonqayman churasqanrayku payqa allinpaj qhawasqa.

¹² Sichus kuraj kamachej phiñakun chayqa, phiñasqa león jina qhaparin, k'acha kayninrí q'achu patapi chhulla jina.

¹³ Wampu chureqa tatanta llakichin. Phiñanakuta mask'aj warmirí lajra p'uñumanta sut'oj yaku jina.

¹⁴ Tatakuna mamakuna wasitawan, qolqetawan chayaqeta jina wawankunaman qonku. Allin yuyayniyoj warmitarí Tata Dioslla qhariman qon.

¹⁵ Qhella kayqa misk'ita puñuchikun. Chaywanpis qhella runaqa yarqhaymanta ñak'arenqa.

¹⁶ Pichus Diospa kamachisqanta kasojqa pay kikinta mayta qhawakun. Tata Diospa yachachisqanta mana uyariyta munajrí wañonqa.

¹⁷ Wajchakunaman manoyqa Tata Diosman mañariy jina, Tata Dios kikintaj chay manuta junt'aponqa.

¹⁸ Wawaykitaqa tiemponpi reparachispa cheqan ñanman churay. Chaywanpis ama wañuchinaykikama jasut'inkichu.

¹⁹ Pichus anchata phiñakojqa llakiyllata tarikonqa. Sonqonta tiyaykuchiyta munanki chaypis, astawanraj phiñakonqa.

²⁰ Yuyaychasqata uyariy, k'amisqatapis jap'ikuy, chay jinapi yachayniyojman tukunki.

²¹ Runaqa tukuy imata ruwananpaj wakichikun. Chaywanpis Tata Diospa yuyasqallan junt'akun.

²² Runamantaqa mana wasanchaj kananta suyanchej. Aswan allinmin wajcha runa kana llulla kanamantaqa.

²³ Pichus Tata Diosta may jatun respetowan qhawaj runaqa unayta kawsanqa. Ajinamanta runaqa may kusisqa kawsakonqa, manataj ima llakiypis payman chayanqachu.

²⁴ Qhella runaqa mikhunata makinpi jap'ishaspapis, chayta manapuni siminman churallanpischu.

²⁵ Sichus asipayakoj runata maqanki chayqa, mana yuyayniyoj runa chayta rikuspa, allin runa kayta yachanqa. Yachayniyoj runarí uj k'amisqalla imatapis yachakun.

²⁶ Pichus tatanmanta suwaj, mamantataj wasinmanta wijch'ojqa, payqa millay p'enqayta ruwaj churi.

²⁷ Wawáy, sichus k'amisqata mana jap'ikunki chayqa, sumaj yuyaychaykunamanta karunchakushanki.

²⁸ Llullakuspa parlaj testigoqa justiciamanta asikun, mana allinta ruwajpa siminmantataj mana allin kajlla llojsin.

²⁹ Alqochakoj runapaj seq'ona wakichisqa kashan, wampukunaj wasankupajtaj sumaj jasut'ina kashan.