Proverbios 18 - DIOSPA QHELQACHISQ

¹ Imatapis payllapaj munaj runaqa paypa allinnillanta mask'an. Wajkuna imatapis yuyaychayta munajtinku, mana uyariyta munanchu.

² Wampoqa manapuni imatapis yachayta munanchu, manachayqa paypa yachasqallanta parlayta munan.

³ Pichus mana allinta ruwajqa p'enqachisqa kanqa, pichus runaykachajtaj millaypaj qhawasqa kanqa.

⁴ Yachayniyoj runaj parlasqanqa manchay ukhu yaku jina, paypa nisqantaj juturi jina mana tukukuyniyoj.

⁵ Mana allinchu mana allinta ruwajta mana juchayojta rikhuricheyqa, nitaj allinchu cheqan runata juchachayqa.

⁶ Wampu runaqa siminwan phiñakuyta jatarichin, parlasqanwantaj jasut'ita tarikun.

⁷ Wampu runa payllamanta mana allinpi tukukun, simillanwantaj payllapaj uma nanayta mask'akun.

⁸ Simi apajpa parlasqanqa misk'i mikhuna jina, runaj sonqon ukhunmanpuni yaykun.

⁹ Qhella runaqa tukuy ima usuchej runawan wawqepura kanku.

¹⁰ Tata Diospa sutenqa sumaj ruwasqa torre jina. Cheqan runakuna chayman ayqespa, sumaj jark'asqa kanku.

¹¹ Qhapaj runaqa kapuyninwan sumaj jark'asqa kasqanta yuyan. Jatun perqawan jark'achasqa llajtata jina qolqenta qhawan.

¹² Pichus runaykachajpaj qhepaman llakiylla jamonqa. Llamp'u sonqo runarí qhepaman allinpaj qhawasqa kanqa.

¹³ Manaraj allinta uyarishaspa imatapis kutichinaqa p'enqaytaj, wampu kaytaj.

¹⁴ Onqosqataqa kawsayta munasqanmin kallpachan. Onqosqa mana kawsayta munajtinrí, pitaj jatarichinmanri?

¹⁵ Allin yuyayniyoj runaqa yachayta astawan jap'in. Yachayniyojpa ninrenqa yachayta mask'an.

¹⁶ Jatun sonqowan waqerejtaqa, tukuy runakuna uyarinku. Chaynejta maypaj qhawasqa runakunaj ñawpaqenmanpis chayanku.

¹⁷ Juiciopi ñawpajta parlarejqa cheqanpi kasqanta rijch'akun. Chaywanpis awqan jamuspa, llullakusqanta sut'inchan.

¹⁸ Allinchay mana atina quejanakuta Tata Diospa makinman saqena, paylla quejanakojkunapaj justiciata ruwan.

¹⁹ Phiñachisqa wawqeqa sumaj jark'achasqa llajta jina, mana yaykuy atina. Wawqepura phiñanakuytaj rejillayoj punku jina t'aqan.

²⁰ Runaj allin kajta parlasqanwan sonqo junt'asqa kanchej, imaynatachus pipis sumaj mikhunata mikhuspa sajsakun, ajina.

²¹ Runaj parlasqanqa atiyniyoj, runata kawsachinapaj manachayrí wañuchinapaj. Tukuy anchata parlajkunaqa uma nanayta tarikonqanku.

²² Pichus warmita tarejqa, allin kajta tarin, Tata Diostaj chaynejta munakususqanta rejsichin.

²³ Wajcha runaqa khuyarikunata mañakuspa parlarikun, qhapaj runarí k'araj simiwan kutichin.

²⁴ Wakin kawsaqekunaqa mana unaypajchu kanku. Chaywanpis wakin kawsaqekunaqa wawqemantapis astawan munakuyniyoj kanku.