Proverbios 10 - DIOSPA QHELQACHISQ

Salomonpa ñawpaj kaj yachachisqankuna

¹ Kaykuna Salomonpa yachachisqankuna kanku: Yachayniyoj wawaqa tatanta kusichin. Wampu wawatajrí mamanta llakichin.

² Millay imakunata ruwaspa qhapajyayqa yanqhalla, cheqan kayta ruwanarí wañunamanta kacharichin.

³ Tata Diosqa allin ruwaj runata mana yarqhaymanta ñak'arejta saqenchu, millayta ruwaj runatatajrí yarqhaymanta ñak'arichenqa.

⁴ Qhella kayqa wajchayayllata apamun, k'uchi kaytajrí qhapajyayta apamun.

⁵ Chajra oqharina tiempopi poqoyta tantajqa yachayniyoj. Chajra oqharina tiempopi puñojrí mana p'enqakuyniyoj runa.

⁶ Allinta ruwaj runapaj saminchaykuna kanqa, millayta ruwaj runatarí chhoqonakuylla atipan.

⁷ Allinta ruwaj runa wañupojtin, runakuna paymanta kusiywan yuyarikunku. Millayta ruwaj runa wañojtinrí, runakuna paymanta usqhayllata qonqapunku.

⁸ .Yachayniyoj runaqa kamachisqakunata jap'ikun, yanqhata thawtej runarí kikinpi urmanqa.

⁹ Pichus allinta ruwajqa ni imamanta manchachikunchu. Pichus mana allinta ruwajrí mana allinpi tukukonqa.

¹⁰ Millayta ruwananpaj ñawinwan ch'irmirej runaqa llakiyta apamun, pichus manakajta thawtejtaj jasut'ichikonqa.

¹¹ Cheqan runaj parlasqanqa kawsay juturi jina, millayta ruwaj runatarí chhoqonakuylla atipan.

¹² Chejnikoyqa phiñanakuyta sayarichin. Munakuyrí tukuy mana allin ruwasqata pampachan.

¹³ Yachayniyojqa yachaywan parlan, mana yuyayniyojpa wasanpajtajrí seq'ona varalla kanqa.

¹⁴ Yachayniyojkunaqa yachayta waqaychanku, wampoj parlasqanrí llakiy kawsayta apamun.

¹⁵ Qhapaj runaqa qhapaj kayninwan jark'akun, wajcha runamantarí mana pipis jark'akoj kanchu.

¹⁶ Cheqan runaj pagonqa kawsaymin, millayta ruwaj runaj tarisqanrí juchalla.

¹⁷ K'amisqata uyarikoj runaqa kawsay ñanta purin, k'amisqata mana uyarikojrí pantay ñanta rin.

¹⁸ Chejnikusqanta pakajqa llullamin. Pichus cuento apaykachajtaj wampumin.

¹⁹ Ashkhata parlanapi pantay tiyanpuni. Pichus siminta wisq'ajrí sumaj yuyayniyoj.

²⁰ Cheqan runaj parlasqanqa sumaj ch'uyachasqa qolqe metal jina, millayta ruwaj runaj yuyayninrí ni imapaj allinchu.

²¹ Cheqan runaj parlasqanqa ashkha runata yachachin, wampu runarí mana yachayniyoj kasqanrayku wañun.

²² Tata Diospa saminchaynenqa qhapajyachin. Chay saminchayqa mana llakichinchu.

²³ Wampu runapaj millayta ruwayqa pujllakuy jinalla. Yachayniyoj runarí yachayniyoj kasqanwan kusikun.

²⁴ Millayta ruwaj runata imatachus manchachikusqan, chayllataj qhatirenqa. Cheqan runatajrí imatachus munasqanta jap'enqapuni.

²⁵ Millayta ruwaj runaqa muyoj wayra jina chinkarin, cheqan runarí wiñaypaj sayallanqapuni.

²⁶ Imaynatachus vinagre runaj kirunta khipichin, q'oshñitaj runaj ñawinta k'arachin, ajinallataj qhella runaqa payta kachajta phiñachin.

²⁷ Tata Diosta may jatunpaj qhawaj runaqa unayta kawsanqa. Mana allinta ruwaj runatajrí pisillata kawsanqa.

²⁸ Cheqanta ruwaj runaj suyakuynenqa kusiymin. Mana allin kajta ruwajpa suyakusqanrí qhasi manakajlla.

²⁹ Tata Diosqa cheqan kajta ruwaj runata waqaychan, mana allinta ruwaj runakunatarí chinkachin.

³⁰ Cheqan runaqa mana jayk'ajpis kuyuchisqachu kanqa, millayta ruwaj runarí kay pachapi mana tiyanqachu.

³¹ Cheqan runaj siminmanta yachay llojsimun, millayta ruwajpa qalluntarí khuchonqanku.

³² Cheqan runaqa k'acha imakunata parlan, millayta ruwaj runarí sajra imakunallata parlan.