Oseas 6 - DIOSPA QHELQACHISQ

Israelitakuna Tata Diosman kutirikunku

¹ Jamuychej, Tata Diosman kutirikunachej. Paymin mitharpariwarqanchej, jinapis payllataj jampikapuwasunchej. Pay k'iriwarqanchej chaypis, payllataj qhaliyachiwasun.

² Iskay p'unchaymantawan kawsarichiwasunchej, kinsa p'unchayninmantaj sayarichiwasunchej paypa ñawpaqenpi kawsananchejpaj.

³ Tata Diosta rejsinapaj kallpakunachej. Payqa noqanchejman jamonqapuni, imaynatachus inti sapa p'unchay llojsimunpuni, ajinata, chayrí imaynatachus paray tiempo chayamojtin paraqa jallp'ata qarpanpuni, ajinata.

Tata Dios israelitakunaman kutichin

⁴ Tata Dios nin: Efraín, imatataj qanwan ruwasajri? Judá, qanwanpis imatataj ruwasajri? Munakuwasqaykichejqa tutamanta phuyu jinalla, chayrí tutamanta chhulla jina chinkaripojlla.

⁵ Chayrayku noqamanta sut'inchajkunanejta mitharparerqaykichej, parlasqaywantaj wañucherqaykichej. Justiciaytaj k'anchay jina sut'ipuni karqa.

⁶ Noqa munakunawaykichejta munani, manataj uywa ñak'asqata jaywanallawaykichejtachu. Diosniykichejta jina rejsikapunawaykichejta munani, manataj uywa ñak'asqata q'olachispa jaywanallawaykichejtachu.

⁷ Chaywanpis aylloyqa Adán jinallataj trato ruwasqayta p'akinku, wasanchawankutaj.

⁸ Galaad llajtaqa millayta ruwajkunaj llajtan, jinataj runa wañuchejkunawan junt'a.

⁹ Sacerdotekunapis wateqaj suwakuna kankuman jina, Sichem llajtaman rina ñanpi wateqaspa, runata wañuchinku. Chay jinata ruwasqankoqa p'enqaymin.

¹⁰ Noqatajrí Israel suyupi millay ruwasqankuta rikuni. Efrainqa ujwantaj ujwantaj khuchichakorqa, Israelpis chayllawantaj ch'ichichakorqa.

¹¹ Judá, mayk'ajchus jasut'isqa kanaykeqa ñapis nisqaña. Chaywanpis uj p'unchay, aylluyta apasqa kasqanmanta llajtanman watej kutichimusaj, nispa.