Oseas 5 - DIOSPA QHELQACHISQ

Israel jasut'isqa kanqa

¹ Tata Dios nin: Sacerdotekuna, kayta uyariychej. Israelitakuna, allinta uyariychej. Kuraj kamachejpa ayllunmanta kajkunapis uyarillaychejtaj: Qankuna juchachasqa kankichej, imaraykuchus Mispapi uj misk'ana jina karqankichej, Tabor orqo patapitaj wakichisqa tojlla jina karqankichej.

² Sitín vallepi ukhu t'oqota allarqankichej. Chayraykumin tukuyniykichejta jasut'isqaykichej.

³ Efrainta noqa rejsini. Payqa manamin mana rejsisqa jinachu noqapajqa. Efrainqa phisu warmi jina wajkunawan khuchichakorqa, Israelpis ch'ichichakullarqataj.

⁴ Israelitakunaj tukuy millay ruwasqanku paykunata jark'an ama noqaman kutirikamunawankupaj. Khuchichakuywan atipasqa kaspa, noqata Tata Diosninkupaj mana rejsikapuwankuchu, nispa.

⁵ Chaywanpis Israelpa runaykachasqanqa paypa contrallanpitaj rimarenqa, Efraintaj juchallanpi misk'akonqa. Judapis paykunawan khuska misk'allanqataj.

⁶ Uj p'unchay ovejankumanta, wakankumanta jaywanapaj aparisqa Tata Diosta mask'anqanku chaypis, manapuni tarenqankuchu, imaraykuchus paykunamanta karunchakunña.

⁷ Tata Diosta wasancharqanku, wawankukunapis waj tatayoj kanku. Chayrayku, kunanqa uj killallapi jallp'ankupis, paykunapis chinkachisqa kanqanku.

Israelwan Judawan jasut'isqa kanqanku

⁸ Gabaa llajtapi maqanakuman wajyana putututa waqachiychej, Ramapitaj cornetata waqachiychej. Bet Avenpi wakichisqa kachunku, Benjaminpipis kikillantaj kachunku.

⁹ Ñak'ariy p'unchay chayamojtin, Efraín thuñichisqa kanqa. Israel jatun ayllukunaman jinapuni kananta willani, nispa.

¹⁰ Noqa Tata Dios nillanitaj: Judamanta kurajkunaqa campopi mojonkunata suchuchej runakunaman rijch'akunku. Chayrayku phiñakuyniyta paykunaj patankuman yakuta jina jich'aykusaj.

¹¹ Efrainqa ñak'ariypi ñit'isqa, sarusqataj kanqa, imaraykuchus lantikunallata yupaychayta munarqa.

¹² Chayrayku Efrainpaj noqa thuta jina kasaj, Judá jatun ayllupajtaj tullu ismuy jina.

¹³ Efrainqa onqosqa kasqanta rikukonqa, Judapis ukhun nanachisqa kasqanta reparakonqa. Chantá Efrainqa Asiriaman renqa kuraj kamachej yanaparinanta mañakoj. Asiriaj kuraj kamachejninrí mana thañichiyta atenqachu, nitaj nanasqantapis jampiykonqachu.

¹⁴ Imaynatachus león uywata jap'inanpaj phawaykun, ajinata noqapis Efrainta, Judatawan ruwasaj. Noqapuni chhikan chhikanta t'isarpariytawan, ripusaj. Noqa jap'ejtiytaj, mana pipis qhechuwayta atenqachu.

¹⁵ Chantá jinata ruwaytawankama, maypichus kanayman kutipusaj, paykuna juchayoj kasqankuta rejsikapuspa, noqata mask'anawankukama. Ñak'ariypi rikhurispa, noqata mask'awanqankupuni, nispa.