Oseas 13 - DIOSPA QHELQACHISQ

Israel suyu laqayaman tukuchisqa

¹ Efraín ayllu parlarejtenqa, Israelmanta wakin ayllukuna kharkatitej kanku, paytataj maypaj qhawaj kanku. Chaywanpis Efrainqa Baalta yupaychasqanrayku juchachakuspa wañorqa.

² Kunanpis juchallikushallankupuni. Qolqe metalta unuyachispa, lantikunata ruwakunku munasqankuman jina. Chantá ninku: Uywa ñak'asqata chaykunaman jaywaychej, nispa. Runakunataj torilloman rijch'akoj lantita much'arinku.

³ Chayrayku paykuna sut'iyaymanta chinkapoj phuyu jina kanqanku, chayrí imaynatachus tuta tutamanta chhulla chinkapun, ajina. Wayralla apakapoj paja jina kanqanku, imaynatachus q'oshñi chinkapun, ajinallatataj chinkaponqanku.

⁴ Tata Dios nin: Noqa Tata Diosniyki kani, Egipto suyupi kashasqaykimantapacha. Ama pitapis Diosniykita jina rejsikapuychu, manachayqa noqallata. Noqallamin Qhespichejniyki kani.

⁵ Noqamin sansarishaj ch'innejpi waqaycharqayki.

⁶ Chaywanpis maypachachus mikhunawan atipacherqaykichej chaypacha, sajsakuspa, sonqoykichej ukhupi mayta jatunchakorqankichej, jinataj noqata qonqarpariwarqankichej.

⁷ Chayrayku, león jina qankunapaj kasaj. Onza jinataj ñanpi suyaykusqaykichej jap'isunaykichejpaj.

⁸ Jukumari imaynatachus phiñarikun uñanta qhechojtinku, ajinata qankunata mitharparisqaykichej. Chay kikinpi león jina oqoykusqaykichej, k'ita animal jinataj chhikan chhikanta mitharparisqaykichej.

⁹ Israel, qanta phirisqayki, imaraykuchus yanapasojniykej contranpi kanki.

¹⁰ Kunanrí, maypitaj kuraj kamachejniyki kashan tukuy suyuykipi jark'akunasunpaj? Maypitaj kashanku kurajniykikuna, pikunamantachus kuraj kamachejniykipaj, kurajniykikunapaj ima mañakuwarqanki, chaykunari?

¹¹ Noqaqa qankunapaj mayta phiñakuspa, kuraj kamachejkunata qorqaykichej. Chantá phiñakuspa, paykunata qhechullarqaykichejtaj.

¹² Efrainpa millay ruwasqanqa qhelqasqa kashan, juchanpis qhelqasqallataj.

¹³ Israelpaj paqarikunan tiempo chayamun, imaynatachus warmita paqarikunan p'unchay chayamojtin nanay jap'in, ajinata. Paykuna wawa jina mana cheqanchakunkuchu paqarinankupaj, mana paqariyta munasqankurayku.

¹⁴ Ukhu pachaj atiyninmantapis libranaychu kanqa? Preciota pagaspa, wañuymantapis kacharichinaychu kanqa? Ya, wañuy, atiyniyki maypitaj kashanri? Qanpatapis, ukhu pacha, maypitaj atiyniyki kashan? Manaña kay runakunamanta khuyakusajchu.

¹⁵ Qhora jinapis Israel t'ikarichun. Inti llojsimuynejmanta wayra phukuspa, Tata Diospa phukusqan wayra, tukuy yaku qochankunata jinataj juturinkunatawan ima ch'akirparichenqa. Awqantaj qhechonqa tukuy ima waqaychasqanta.

¹⁶ Samaria llajtapis jasut'isqa kanqa, Diospa contranta oqharikusqanrayku. Chaypi tiyakojkuna espadawan wañuchisqa kanqanku, wawankupis ch'allpasqa kanqanku, onqoj warmikunapis khallasqa kanqanku.