Oseas 11 - DIOSPA QHELQACHISQ

Diosqa Israel suyuta munakun

¹ Tata Dios nin: Maypachachus Israel aylluy wawallaraj karqa chaypacha, noqa payta munakorqani, jinataj Egipto suyumanta payta wajyarqani.

² Chaywanpis astawan payta wajyashajtiy, astawan noqamanta karunchakuwarqa. Payqa uywa ñak'asqata qhasi manakaj dioskunaman jaywarqa, inciensotataj lantikunaman q'oshñicherqa.

³ Makinmanta jap'ispa, noqa Efrainta puriyta yachacherqani. Chaywanpis pay mana repararqachu noqamin payta waqaychashasqayta.

⁴ Misk'i simiwan sonqonta suwarqani, munakuywantaj waskhawan jina payta aysamorqani. Ñuñoj wawata jina uyayman astawan k'askaykuchikorqani, makiywantaj mikhucherqani.

⁵ Chaywanpis paykunaqa mana noqaman kutirimuwayta munarqankuchu. Chayraykumari Egiptoman kutirinanku kanqa, Asiriataj paykunata kamachenqa.

⁶ Israelpa llajtankunapi maqanaku kanqa, jark'achasqa llajtankunapis thuñisqa kanqa. Imaymana wakichikusqankupis chinkachisqallataj kanqa.

⁷ Israel aylloyqa noqamanta karunchakuyllatapuni munan. Chayrayku janaj pachaman qhaparikojtinkupis, paykunata ni pi yanapanqachu.

⁸ Efrainníy, imaynatataj saqerparisqaykiri? Israelníy, imaynatataj wijch'urparisqaykiri? Imaynatataj Adma llajtata jina chinkarparichiykimanri? Imaynatataj Zeboyin llajtawan ruwarqani, ajinallatatajchu qanwanpis ruwaymanri? Sonqoyqa wawayawan qanpaj khuyakuyniy junt'a kasqanrayku.

⁹ Mana phiñakuyniy k'ajarisqanman jinachu ruwasaj. Mana ujtawan Efrainta chinkachisajñachu, imaraykuchus noqaqa Dios kani, manataj runachu. Noqa chawpiykichejpi May Llimphu Kaj Diosmin kani, manataj phiñasqachu qankunaman jamusaj.

¹⁰ Aswan qhepaman israelitakuna qhepayta jamonqanku. Noqa Tata Diosqa león jina qhaparisaj, qhaparejtiytaj, aylluymanta kajkuna inti yaykuynejmanta kharkatitispa jamonqanku.

¹¹ P'isqokuna jina Egiptomanta kharkatitispa phawamonqanku, Asiriamantataj urpikuna jina phawamonqanku. Jinamanta noqa ujtawan wasinkupi tiyakunankuta ruwasaj. Chayta noqa Tata Diosmin nini.

Diospa ayllun juchallin

¹² 12 (12.1)Efrainqa llullerionwan umayta q'epichayta munawan. Israelpis q'otiyayta munawan. Judamanta kajkunapis noqa mana wasanchaj Diosmanta t'aqakuwanku, lantikunaman qonqorikunankupaj.