Números 4 - DIOSPA QHELQACHISQ

Levitakunaj ruwananku

¹ Tata Dios Moiseswan, Aaronwan ima parlaspa, nillarqataj:

² Levitakuna jatun ayllumanta Coatpa mirayninta sapa wasi aylluta ñawpa tatankoj sutinkuman jina yupaychej.

³ Listankichej kinsa chunka watayojmanta phishqa chunka watayojkama qharikunata, pikunachus Dioswan Tinkukuna Toldopi imachus ruwanata ruwanankupaj jina kajkunata.

⁴ Coatpa mirayninpata Dioswan Tinkukuna Toldopi ruwanankoqa Diospaj t'aqasqa imakunata qhawananku kashan.

⁵ Israelitakuna puririnankupaj toldonkuta oqharejtinku, Aaronwan chantá churinkunawan ima Dioswan Tinkukuna Toldopi velota oqharenqanku. Chay veloqa Diosllapaj T'aqasqa Cheqaman yaykunapi kashan, chaywantaj Dioswan trato ruwasqa arcata qhataykonqanku.

⁶ Chaypa patanmantaj tejón qaramanta ruwasqa qhatanawan qhataykonqanku. Chaypa patanmantaj anqa bayetawan qhataykullanqankutaj. Chaymantaj arcata wantunapaj k'aspita ninrinta pasachenqanku.

⁷ Chaymantataj Diosman jaywasqa t'antata churanapaj chay mesata anqa bayetawan qhataykonqanku. Chaypa patanmantaj chuwakunata, wisllakunata, copakunata, vino ofrendata jaywanapaj yurukunata ima churanqanku. Jinallataj mesaman Diosman jaywasqa t'antata sapa p'unchay churallanqankutaj.

⁸ Chaykunaj patanmantaj puka bayetawan qhataykonqanku. Chay patanmantaj tejón qaramanta ruwasqa qhatanawan qhataykullanqankutaj. Chaymantataj chay mesaj ninrinman k'aspita pasachenqanku.

⁹ Chantá candelerota, lamparakunata, pábilo k'utunata, ushpha tantana chuwitakunata, jinataj candeleroman aceite jich'anata ima anqa bayetawan qhataykullanqankutaj.

¹⁰ Chay tukuyninta tejón qaramanta ruwasqa qhatanawan mayt'uykonqanku. Jinaspataj, kallapu pataman wantunapaj churaykonqanku.

¹¹ Chaymantaqa qorimanta ruwasqa altartañataj anqa bayetawan qhataykonqanku. Chaymantataj tejón qaramanta ruwasqa qhatanawan mayt'uykonqanku. Chantá wantuspa, apanapaj k'aspita pasachenqanku.

¹² Chaymantataj Dioswan Tinkukuna Toldopi Diosta yupaychanapaj imakunachus kajta anqa bayetaman churanqanku. Chaytataj tejón qaramanta ruwasqa qhatanawan mayt'uykonqanku. Jinaspataj, wantunapaj kallapu pataman churanqanku.

¹³ Chantá altarmanta ushphata pichanqanku, jinaytawantaj, puka panti bayetawan altarta qhataykonqanku.

¹⁴ Chay patanmantaj Diosman jaywanapaj imakunata churanqanku: Nina k'ajata oqharinata, trinchekunata, lampakunata, chuwakunata, chantá altarpata imanchá tiyan, chaykunatawan ima. Chaymantataj patanman tejón qaramanta ruwasqa qhatanatawan qhataykonqanku. Chantá oqharispa, wantunapaj k'aspita altarpa ninrinnejta pasachenqanku.

¹⁵ Maypachachus Aaronwan, churinkunawan ima tukuy chaykunata q'epichayta tukojtinku, jinataj puririnapaj jinaña kashajtinku, Coatpa churinkuna tukuy chaykunata apanankupaj jamonqanku. Chaywanpis paykunaqa Diospaj t'aqasqa imakunata ama llankhanqankuchu. Sichus llankhanqanku chayqa, wañonqanku. Ajinata Dioswan Tinkukuna Toldoj imankunata Coatpa churinkuna apanqanku.

¹⁶ Sacerdote Aaronpa churin Eleazar qhawanqa lamparakunapaj aceite ama pisinanmanta. Jinallataj sumaj q'apashaj inciensomanta, ch'aki mikhuy jaywanamanta, Diospaj t'aqanapaj jawina aceitemanta qhawallanqataj. Chantá Dioswan Tinkukuna Toldomanta chaypi tukuy ima kajmanta, chantá Diospaj t'aqasqa imakunatawan qhawallanqataj, nispa.

¹⁷ Tata Diosqa Moiseswan, chantá Aaronwan ima parlaspa, nillarqataj:

¹⁸ Qankunaqa Leví jatun ayllu ukhumanta Coatpa miraynin chinkapunanta ama saqenkichejchu.

¹⁹ Paykuna Diosllapaj t'aqasqa kajman qayllasqankurayku ama wañunankupaj kay jinata ruwanaykichej tiyan: Aaronwan, chantá churinkunawan ima Coatpa mirayninmanta sapa ujman imatachus apanankuta, chantá imatachus ruwanankuta ninanku tiyan.

²⁰ Chaywanpis paykunaqa Diosllapaj t'aqasqa imakunata qhawaj mana yaykunankuchu tiyan, ama wañuchisqa kanankupaj, nispa.

²¹ Chantá Tata Dios Moisesta nillarqataj:

²² Jinallataj Gersonpa mirayninta yupallankitaj, sapa ujta tatankoj sutinkuman jina listaspa.

²³ Qharikunata kinsa chunka watayojmanta phishqa chunka watayojkama yupanki, Dioswan Tinkukuna Toldopi imachus ruwanata ruwanankupaj jina kajkunata.

²⁴ Gersonpa mirayninmanta kajkunaj ruwananqa kay kanqa:

²⁵ Paykunaqa Dioswan Tinkukuna Toldoj cortinankunata, tejón qaramanta ruwasqa qhatananta, chantá toldoman yaykunaj cortinanta ima apanqanku.

²⁶ Patioj cortinankunata, Dioswan Tinkukuna Toldopi patioman yaykuna cortinata Apallanqankutaj, chantá altartawan muyurishan, chayta. Jinallataj waskhankunata, watanapaj imakunata, chantá imachus ruwanapaj imakunatawan ima apallanqankutaj. Chaymin paykunaj ruwananku kanqa.

²⁷ Gersonpa ayllun imatachus ruwanankuta, chantá imatachus apanankutawan Aaronwan, churinkunawan ima kamachenqanku. Ajinata qankunaqa paykuna imatachus ruwanankuta sut'ita rikuchinkichej.

²⁸ Chaykuna Gersonpa ayllun Dioswan Tinkukuna Toldopi imachus ruwananku kanqa. Sacerdote Aaronpa churin Itamartaj paykunata kamachenqa.

²⁹ Jinallataj Merarij mirayninta yupallankitaj, sapa ujta ñawpa tatankoj sutinkuman jina listaspa.

³⁰ Paykunamanta kinsa chunka watayojmanta phishqa chunka watayojkama qharikunata listanki, pikunachus Dioswan Tinkukuna Toldopi imachus ruwanata ruwanankupaj jina kajkunata.

³¹ Dioswan Tinkukuna Toldopi paykunaj ruwanankoqa kay jina kanqa: Toldoj tablankunata, wajtera k'aspinkunata, sayantankunata, chantá chukukunata ima apanqanku.

³² Jinallataj Dioswan Tinkukuna Toldoj pationta muyuykushan, chay sayantakunata, chukukunata, estacakunata, waskhakunata, watanapaj imachus kajkunata, chantá imachus ruwanapaj imakunatawan ima apallanqankutaj. Sapa ujman imatachus apanankuta qan sut'ita kamachinki.

³³ Merarij ayllun Dioswan Tinkukuna Toldopi imachus ruwanankoqa chaykuna kanku. Paykunatataj sacerdote Aaronpa churin Itamar kamachenqa, nispa.

³⁴ Chantá Moiseswan, Aaronwan, jinataj sapa ayllu t'aqata kamachejkunapiwan ima, Coatpa mirayninmanta kajkunata ñawpa tatankoj sutinkuman jina yuparqanku.

³⁵ Qharikunata yuparqanku kinsa chunka watayojmanta phishqa chunka watayojkama, Dioswan Tinkukuna Toldopi ruwanankupaj jina kajkunata.

³⁶ Ayllunkuman jina yupasqa qharikunaqa tukuyninpi 2.750 karqanku.

³⁷ Chaykuna Coatpa mirayninmanta Dioswan Tinkukuna Toldopi imachus ruwanata ruwanankupaj jina karqanku. Ajinata Moiseswan, chantá Aaronwan ima Tata Dios Moisesnejta kamachisqanman jina listaspa, yuparqanku.

³⁸ Gersonpa miraynenqa sapa aylluman jina, jinataj tatankoj sutinman jina yupasqa karqanku,

³⁹ kinsa chunka watayojmanta phishqa chunka watayojkama qharikuna, Dioswan Tinkukuna Toldopi imachus ruwanata ruwanankupaj jina kajkunata.

⁴⁰ Paykuna tukuyninpi 2.630 karqanku.

⁴¹ Chaykuna Gersonpa mirayninmanta karqanku, pikunachus Dioswan Tinkukuna Toldopi ruwanayoj karqanku, chaykuna. Moiseswan, chantá Aaronwan ima, Tata Diospa kamachisqanman jina, paykunata yuparqanku.

⁴² Merarij miraynenqa ayllunkuman jina yupasqa karqanku,

⁴³ ñawpa tatankoj sutinkuman jina. Kinsa chunka watayojmanta phishqa chunka watayojkama qharikuna listasqa karqanku, Dioswan Tinkukuna Toldopi ruwanankupaj jina kajkuna.

⁴⁴ Tukuyninkutaj 3.200 karqanku.

⁴⁵ Chaykuna Merarij mirayninmanta qharikuna karqanku. Paykunata Moiseswan, chantá Aaronwan ima Tata Dios, Moisesta kamachisqanman jina, yuparqanku.

⁴⁶ Ajinata Moiseswan, Aaronwan, chantá israelitakunata kamachejkunapiwan ima levitakunata tukuyninta yuparqanku, ayllunkuman jina, chantá tatankoj sutinman jina.

⁴⁷ Kinsa chunka watayojmanta, phishqa chunka watayojkama qharikuna yupasqa karqanku, Dioswan Tinkukuna Toldopi ruwanankupaj jina kajkuna.

⁴⁸ Leví ayllumanta tukuyninpi 8.580 karqanku.

⁴⁹ Ajinata Tata Dios Moisesman kamachisqanman jina levitakunata yuparqanku. Moisestaj Tata Dios kamachisqanman jina, sapa ujman imatachus ruwanankuta, chantá imatachus apanankuta nerqa.